Briefwisseling. Deel 4: 1644-1649
(1915)–Constantijn Huygens–
Auteursrecht onbekend4194. Aan prinses Amalia van Oranje. (H.A.)*En suitte de ma lettre d'hier, et des rapports que beaucoup d'avantcourreurs auront esté faire de bouche à V.A., la capitulation entamée hier a esté achevée aujourdhuy. Celle qui regarde les ecclesiastiques et la bourgeoisie vient d'estre signée, et celle des gens de guerre le sera dans une heure ou deux. Demain, qui sera dimanche, ils doibvent sortir. - Du costé de decà M. Puchler avoit gaigné et maintenu le logement sur la pointe du bastion, et en le contestant nos gens avoyent jetté là, ceste nuict, jusques à 550 grenades à main, et peut estre n'en avoyent receu guere moins, mais le tout sans perte considerable de gens, fors de quelques vingt ou trente blessez. Du eosté de M. de Brederode il n'y eut pas moyen de maintenir un semblable poste sur leur bastion, mais enfin quelques compagnies du bijwacht ayant esté menées par M. DolmanGa naar voetnoot2) vers un troisiesme quartier de la ville, où ils apprehendoyent qu'on ne passast un pont, il s'entendit soudainement un grand et pitoyable cri, de mesme que si la ville eust esté pillée, et tost apres le tambour de composition fut ouy. Deux capitaines des nostres entrerent, et deux des leurs sortirent en ostage. Apres midy les articles demandez pour le gouverneur et la garnison furent apportez par un autre capitaine, et ceux qui regardent les gens d'eglise et la bourgeoisie par le doyen et le bailly. J'envoyeray à V.A. la copie de ce qui a esté accordé aux uns et aux autres en mesme temps qu'on l'envoyera aux Estats Generaulx. Ce qui touche les gens de guerre est à l'ordinaire, aussi pour la bourgeoisie. Aux ecclesiastiques on accorde la mesme chose qu'aux bourgeois, jusques à ce que Messieurs les Estats generaulx en auront ordonné à leur volonté. Bien entendu qu'entretemps il n'y aura point d'exercice publiq d'autre religion que de la reformée. Ma prochaine dira des particularitez de la sortie. Au camp devant Hulst, le 4e de Novemb. 1645. |
|