Briefwisseling. Deel 4: 1644-1649

4146. Aan prinses Amalia van Oranje. (H.A.)*

Nous continuons de prendre les forts d'icy autour. La nuict d'hier celuy de Ferdinando fut rendu, aveq trois pieces de fer, et en sortit un enseigne aveq 80 hommes, sans qu'on fust encor gueres en posture de le forcer, par un beau et profond fossé qui l'entourre, mais le bruict qu'on menoit, comme pour faire avancer le pont, qui estoit bien loing de là, les fit rendre la place soudainement. Tout ce monde s'en va perdu pour la ville, et nous les envoyons continuellement porter des nouvelles à Anvers. A present on attaque S.^t André, qui est beau et grand. Hier Spinola fut sommé par un trompette, mais le

[p. 225]

commandeur fit prier S.A. de considerer la bonté de la place et du secours qui luy estoit venu, aveq quoy il valoit mieux qu'il mourust en se defendant, que de se veoir oster la teste dessus un eschaffault. Là dessus hier au soir M. Eerenreiter¹⁾ y fut envoyé pour l'assieger aveq ceremonie. Ceste nuict il y a faict quelque sorte de blinde, pour couvrir son monde, qui autrement est à la merci de tout le feu de ceux du fort, et continue ainsi de travailler. Mais le malheur a voulu qu'une bale de canon a percé lentement ladite blinde et luy a donné droict contre la poitrine, dont il est tombé esvanouy, mais tost apres est revenu à soy, et a voulu demeurer au poste, jusques à ce qu'au soir on l'aille relever de garde. Ainsi parfois l'un et l'autre aura son tour. Ceste mesme nuict nous avons comme donné commencement à l'attaque de la ville mesme. Dans un coing de digue avancée, que j'ay dit nous couvrir jusques à la portée du pistolet, M. de Haulterive a eu ordre d'aller faire un logement, hors duquel on va conduire peu de longueur de lignes qui nous mettront sur la contrescarpe. Une femme sortie aveq permission de la ville, asseure qu'il y a grand monde refugié, mais peu de soldats, et que la pluspart souhaitte de nous y veoir dedans en bref, comme ils le croyent fort apparent. - Un païsan vient d'adviser que M. de Lorraine marcheroit vers le Brabant, comme pour faire diversion, mais on a de la peine à tenir le rapport pour tres-authentique. M. le drossart de Breda²⁾ sera porteur de la presente. J'ay en tort d'entreprendre si avant sur les rapports qu'il aura l'honneur de faire de bouche à V.A. et supplie tres-humblement V.A. de luy demander quel visage il a laissé à son maistre, dont je m'asseure qu'elle demeurera satisfaicte. Au camp devant Hulst, le 8^e d'Octob. 1645.

1) Zie II, blz. 291.

2) Nl. Johan van Aerssen; zie II, blz. 326.