Briefwisseling. Deel 4: 1644-1649

4052. Aan prinses Amalia van Oranje. (H.A.)*

Par tout ce que l'on peut apprendre de certain du costé des enemis ils ont encor resolu d'envoyer partie de leur monde vers le païs de Luxemburg, et mesme en seroit il parti des hier, et quelques gens du duc de Lorraine les devoyent suivre. Tout son plus grand reste est logé au Nord de Flandres, où se trouvans comme en prairie nouvelle ils se font traicter en gallands,

[p. 184]

tant de nourriture que de bon argent comptant. C'est devers ce Nord où les enemis apprehendent extremement nostre attaque. Hier M. le comte Maurice fut aveq quelques six ou sept eens chevaulx et quelqu'infanterie vers Damme et Bruges, où il fut tiré quelques coups de canon aux volontaires, et au reste l'alarme chaude de tous costez, si bien que ceste nuict passée tout avoit esté en bataille sur les canaulx, et un de nos trompettes, revenu de Damme, rapporte, comme le comte de Meghen l'avoit asseuré qu'à son retour il ne trouveroit plus S.A. à Maldeghem, mais à Male entre ledit Damme et Bruges, au moins, et pour certain, M. de Brederode aveq sa trouppe. Mais qu'ils nous y avoyent preparé à boire, c'est à dire, qu'ils mettroyent l'eau dans le païs, comme en effect ce trompette avoit veu une grande quantité de paisles dans la porte de Damme, toutes prestes à percer les digues, qui en plusieurs endroicts n'avoyent plus qu'un pied ou deux de terre de reste, et pouvoyent estre ouvertes en un moment; mesmes d'aucunes l'avoyent esté hier, à la venue du comte Maurice, mais furent rebouchées, comme il se retira. Le baron Beck a aussi son poste plus proche de Gand à Meulestee; de sorte que toute la guerre s'est maintenant tournée vers deçà. - A la grande conference qui a esté tenue à Bruges¹⁾ l'on a sceu par la voye de France, que Piccolomini a soustenu qu'à moins que de hazarder une bataille le païs s'en va perdu. Sur quoy il y en a qui disent, qu'ils auroyent faict couler du monde vers Duijnkercke, et que mesme le marquis de Castelrodigo s'y en seroit allé. - Ainsi toutes nos nouvelles ne consistent qu'en menaces et grimaces de part et d'autre. Quand il plaira à Dieu de les convertir en choses effectives, à quoy il est bien à croire que l'on songe nuict et jour, Vostre Alt.^e en sera informée tres particulierement ..... Au camp a Maldeghem, le 3^e d'Aoust 1645.

1) Zie No. 4034.