Briefwisseling. Deel 3: 1640-1644

[p. 457]

3446. Aan P. Mersenne¹⁾.

Voyci le jeusn' homme, le S.^r Elzevier²⁾, fils de nostre imprimeur à Leiden, qui m'a tousjours promis d'estre le porteur de ces pacquets de té, et s'est trouvé arresté icy par la contrarieté des tems jusques à present. La saison toutefois se disposant à la gelée, je l'en charge de bonn' heure, de peur qu'il ne m'eschappe soudainement. Faictes bien recognoistre par les friands la difference qu'il y a entre le xà ou chà et le té commun. Le premier est té aussi, mais la fleur de l'herbe est de bien plus grande vertu, qui à la verité n'est pas pour m'y affriander, car desjà l'ordinaire m'est trop fort et m'empesche si absolument de dormir que malgré moy il fault que je m'en abstienne, l'estimant d'ailleurs comme une herbe merveilleuse et saincte, tant je l'ay trouvé capable de raffiner et subtiliser l'esprit, à qui a besoin de l'employer en affaire soit serieuse ou de plaisir. Mon eloge en est cognu icy; c'est qu'un homme qui a prins du té vault doublement sa valeur ordinaire, en gaignant la conception prompte, fertile, aysée et, qui plus est, infatigable, qui est un grand point en occasion de necessité urgente. J'en laisse le reste à l'experience, et m'offre à vous en encor avoir davantage, si le desirez, au moins du commun qui seul est de ma cognoissance, n'en ayant jamais prins, ny tasché de prendre d'autre ..... A la Haye, le 12^e de Janvier 1644, apres vous avoir escrit par l'ordinaire.

1) De brief bevindt zich in de Bibllothèque Nationale te Parijs. - Zie II, blz. 274.

2) Zie blz. 241.