Briefwisseling. Deel 3: 1640-1644

3340. J. Zuerius²⁾. (L.B.)

Vous avez en l'armee bien eu les nouvelles de ce que l'ennemi soubz la conduitte du general Cantelmo a attenté et effectué en la Meijerie de Boisleduc, mais j'apprens par ce que depuis mon partement de Boisleducq on y commence a ranger effectivement les bourgeois en compagnies et les obliger aux veilles et garde, que Son Al.^ze n'a poinct information ni cognoissance du principal desseing que l'ennemi n'a jugé a propos d'intenter contre la ville de Boisleducq, entendant que les bourgeois n'avoient encor poinct de drapeaux ni assignation de leurs quartiers ou places de rendevous, ou en telle occurrence se rendront non seulement les enroollez, mais aussi tous les autres, chacun en son quartier, de sorte qu'ilz ne pouvoient encor poinct faire quelque corps suffisant pour s'emparer d'une porte, affin de l'ouvrir aux ennemis, desquels ilz ont asseurance d'estre remis a leurs anciens privileges, principalement de n'estre poinct chargez d'anciens impostz, gabelles ou autres impositions sans y avoir consenti, et de n'estre plus gouvernez par des magistrats estrangers dont la plus grand part ne possede maison propre ni aucun bien patrimonial dedans la ville, ni continuez outre le terme ordinaire, et que ne seront commandez des capitaines qui leur sont tant a contrecoeur pour s'estre faict tous quattre freres, voire les deux chefs de la sodalité Mariane³⁾, ayant par menaces obligé les autres de les recevoir en la sodalité, en violant les articles de la capitulation par Son Al.^ze leur accordee et jusques alors en ce poinct sainctement entretenue, en portant mesme tous les freres leur cappen ou chapperons aux enterrements de leurs freres defuncts, que du depuis on leur a empeché, dont extremement offensez ilz abandonnerent en pleine rue le premier enterrement d'un frere trespassé, s'absentant en apres pour la mesme raison de l'enterrement d'un autre frere mort, pour ne vouloir marcher sans enseigne ou symbole non plus que les soldatz sans drapeau. Plusieurs autres sujectz de mescontentement peu utiles a cest Estat ont tan[t] enaigri les coeurs des bourgeois, que generalement ilz adjoustent foy aux douces promesses espagnolles de meilleur traictement en religion, justice et police. On tient qu'il n'y a pas 200 bourgeois de la religion reformee dont on se puisse fier au besoing, mais que le nombre de la garnison presente de la ville de Boisleducq ne faict pas la moitié des bourgeois mal affectionnez a cest Estat, de la mauvaise volonté et force desquels j'apprehens

2) Zie I, blz. 354.

3) Waarschijnlijk is bedoeld de Broederschap van Onse Lieve Vrouwe, die een altaar had in de S^t. Janskerk.

[p. 418]

qu'un jour on ne voye la preuve a nostre grand regret, a perte inestimable de l'Estat et ruine totale de plusieurs honnestes familles. Aussi ceste garde de bourgeois n'exemptera ni relevera poinct les soldatz, plustost les chargera davantage, or la ville perdue, les ennemis, devant que les nostres la pourront avoir assiegee et close, auront moien de la pourveoir de toutes necessitez pour gaigner aussi ce petit chasteau qui n'a aucun ouvrage ni fortification dehors, plus tost ou devant que les nostres ne reciperont la ville, n'estant la saison toujours commode pour faire un siege autour de la ville, les inhabitans de laquelle, aussi bien que tant de comptoirs de l'Estat, cependant y seront pillez et saccagez. Mes devoirs m'ont obligé de vous communiquer les avis que j'ay des amis confidens touchant les intentions des ennemis, affin que Son Al.^ze, en estant advertie, on y pourvoye avec plus de facilité devant la chose faicte, en arrestant la course de ces quattre nouveaux capitaines de la bourgeoisie, qu'on ne pourroit y remedier apres la consommation de leur desseing, en licenciant ou dissolvant les compagnies, car les places des rendevous une fois assignees pourront servir a jamais pour leurs assemblages aux occasions qu'ilz ingerent de s'en pouvoir prevaloir. Je n'eusse pas tant particularisé en quoy les bourgeois prennent sujet de mescontentement et les moyens d'y remedier, si je ne vous avois aussi souventefois tesmoigné que je ne desire point de part de la magistrature, et moins encore en ceste sodalité idolatrique. Me reservant jusques a nostre entrevue la communication de ce que les miens ont veu et remarqué aux actions dudit general Cantelmo au village de Gestel, apres avoir marché avec 400 hommes a cheval et 200 a pied, tout joignant mes terres et maison, laquelle, sans en estre recherché, il pourveut de quattre sauvegardes a cheval, me recommanderai bien humblement a vos bonnes graces ..... De la Haye, 1 d'Aougst 1643.