Briefwisseling. Deel 3: 1640-1644

3329. Aan prinses Amalia van Oranje. (H.A.)*

Le coronel Ysselstein enfin, apres avoir receu les ordres bien reïterez de S.A. a comprins, qu'il n'estoit point de service au Lijmers, et s'en est venu à Nimmeghe, de là à Gennep, où il a mis 150 hommes de pied, et de là à Grave, où ayant apprins, que l'enemy, logé à Lith et Littoyen, sembloit approché de la Meuse pour la passer, et puis, peut estre, le Wael, s'il pouvoit, s'en est la mesme nuict retourné à Nimmeghe, et de là est descendu le long des digues, jusques à Tiel, Voorn et Bommel, où desjà il avoit mis quelque infanterie, mais l'en avoit retirée, le lieutenant coronel Hallart estant survenu, et ayant envoyé dans Bommel deux de ses compagnies et une dans S.^t Andries. Apres quoy ledit Ysselstein s'en estoit remonté vers Nimmeghe, pour prendre garde au Wael et ce que l'enemy y pourroit attenter. - Cantelmo a pillé la villette d'Eindhoven, qui est soubs contribution, et nous donne le mesme droict de piller tel païs qu'il nous plaist, de quoy, si nous le mettons en execution, il n'aura gueres de gré, cela estant contraire à toute regle de guerre, observée jusques a present. Il pourra arriver du malheur de cecy aux innocens, de mesme qu'il en prendra au païs de Liege, à raison de la violence faicte par les païsans Liegeoiz aux officiers de Madame la Landgrave¹⁾ à la maison de Gronsfelt près de Maestricht, qui est par trop enorme et barbare.

En espiant icy les occasions de nuire à l'enemy en quelqu' endroict, nous continuons de nous tenir prests au depart, pour le premier commandement, encor qu'on ne se hastera pas de deferer cest honneur à la levée de bouclier de Cantelmo, maintenant qu'il a du mordre en teste, et que chascun est sur ses gardes. - Demain S.A. sera en gaste chez M. le comte Guillaume gouverneur de Frise²⁾.

M. Hume m'a prié de remonstrer à S.A. comme M. de Heenvliet continue de se faire traicter a part de la moitié des plats de Madame la Princesse Royale, desirant sçavoir la dessus les intentions de S.A., qui vient de me commander de luy rescrire, comme je fay, qu'elle ne veult point disputer à Madame Stanhop la liberté de pouvoir quelquefois se retirer, et manger seule dans sa chambre, mais que pour l'ordinaire S.A. n'entend pas qu'il soit rien alteré au reglement qu'elle a une fois faict en sa maison, sans son ordre contraire. Au camp à Assenede, 24^e Juillet 1643.

1) Amalia Elisabeth van Hessen; zie II, blz. 522.

2) Willem Frederik van Nassau.