Briefwisseling. Deel 3: 1640-1644

3091. Aan prinses Amalia van Oranje⁵⁾. (H.A.)*

Nostre oysiveté me prive de l'honneur de pouvoir souvent entretenir V.A. de chose de consequence. Avanthier nous eusmes encor de la cavallerie en campagne soubs M. le comte de

5) Uitgegeven in Archives de la Maison d'Orange-Nassau, 2^e série, IV, blz. 57.

[p. 325]

Stierum¹⁾ et M. le Rhingrave²⁾, aux environs de Gelder, et j'esperoy en tirer le subject de quelque bonne lettre, mais l'occasion fut vaine et sans effect, n'y paroissant personne de ceux qu'on avoit creu y attrapper.

Le S.^r Tupadel³⁾, sorti la sepmaine passée aveq bon nombre de leur cavallerie au païs de Juliers, a pensé aussi donner argument de beaux discours aux Imperiaulx, qui avoyent faict compte de le saluër à la retraicte de certain passage bien estroict; mais ils vindrent tard et la belle occasion leur eschappa. Ainsy Dieu benit mesme de bonheur extraordinaire ces gens, qui d'ailleurs reçoivent tant de maledictions, pour les violences tres-insolentes qu'ils commettent journellement, sans consideration de partis amiz ou enemiz, comme depuis peu de jours il a paru à Eupen, grand bourg aupres de Limbourg, et florissant en draperie, qu'ils ont totalement saccagé, aveq des desordres honteux à dire; le tout nonobstant la sauvegarde de tous deux leurs generaulx.

M. le comte de Guebriant⁴⁾ fut hier icy, assisté, depuis peu, de ses gardes de corps, en casaques d'escarlatte en broderie d'argent. On nous dit qu'aussi l'ordre du S.^t Esprit luy a esté envoyé; qui est un honneur bien extraordinaire, la coustume portant que chascun l'aille querir. Aujourdhuy Monseign.^r le Prince Guillaume est allé faire une visite audit mareschal en son armée, d'où il reviendra vers le soir. - Avanthier un convoy de Grave vers Nimmeghen, fort de 80 hommes, a esté battu, et le jeusne Vane⁵⁾, aveq quelques autres personnes de Grave, faict prisonnier.

S.A. a si bon visage depuis que nous sommes en campagne, que le capitaine Berck⁶⁾, commandeur de Duijsburg, protesta dernierement en ladite ville, qu'il ne la trouvoit en aucune sorte changée, hormis le grisonnement de la teste, depuis onze ans qu'il n'avoit eu l'honneur de la veoir. Il me semble que ces experiences si frequentes debvroyent estre capables d'induire S.A. à faire un peu plus la vie de campagne à la Haye, qu'elle n'a accoustumé. Au camp à Bodbergh, le 4^e d'Aoust 1642.

1) Zie II, blz. 521

2) T.a.p., blz. 32.

3) Zie blz. 301.

4) Zie II, blz. 477.

5) Zie blz. 245.

6) Walter Berck komt reeds in 1631 voor als kapitein. (Meded. van den Heer Wakker.)