2588. Aan prinses Amalia van Oranje. (H.A.)*
Vostre Alt.e aura veu par celle que j'eus l'honneur de luy escrire de Groninghe avanthier, comme S.A. avoit resolu de partir de là aujourdhuy. Ceste resolution a tenu en sorte, qu'apres que S.A. eust faict son repas entre huict et neuf heures, elle a dict adieu à tout ce monde grand et petit, trescontent et satisfaict de sa gracieuse presence, est montée en carosse, et arrivée en ce village au coucher du soleil, lequel pourtant nous n'avons point veu d'aujourdhuy, à cause du temps couvert et pluvieux qu'il a faict. Par où nous sommes assez en peine du reste de ce voyage, la gelée ayant assez bien faict rouler les rouës jusques à present, mais le degel nous menaçant de plus mauvais chemins pour l'advenir. - Quoy qu'il en soit, on pretend de coucher demain à Couvorden. Si de là il est possible de passer jusques à Hardenbergh - comme on l'espere encores - l'intention de S.A. est d'estre dimanche à Swoll, pour de là prendre le chemin que la saison et la gelée ou le degel enseigneront. Tont ce que je trouveray d'intervalle à faire entendre à V.A. ce que nous devenons, plus viste que nous ne pourrons porter nous mesme la nouvelle, je l'y employeray diligemment. Comme à present il m'a semblé debvoir escarter ce messager du chemin de Couvorden, pour en donner cognoissance à V.A., quoyque preadvertie que telle estoit la resolution.
La chere du festin des Estats de Groninghe fut tres-grande avanthier, et repartie en trois tablées en mesme sale, où nous avons veu S.A. passer de l'une à l'autre aussi jovialement, et aveq une complaisance si gaye et, en un mot si incomparable, que, s'il eust esté l'hoste du convive au lieu de convié, il n'en eust peu faire davantage, ni d'un coeur plus ouvert. Les flutes cependant y firent de furieux accords, mais, grace à Dieu, S.A. ne faict pas la mine de s'en ressentir en aucune sorte, et garde le visage aussi gay que Monseigneur le Prince Guillaume. A Rolde en Drenthe, le 29e de Novemb. 1640.
Auteursrecht onbekend