2578. Aan prinses Amalia van Oranje. (H.A.)*
Son Alt.e souppa hier à Bodegrave et tost apres se rembarqua, en se faisant tirer à la rame toute la nuict, de sorte qu'il arriva ce matin entre sept et huict heures à Utrecht, où il prevint les debvoirs de la bourgeoisie, qui estoit apres à s'armer, et n'avoit peu imaginer qu'il arriveroit si tost. A midi Messieurs les Estats d'Utrecht l'ont traicté en un beau et grand festin, apres que S.A. eust employé la matinée à veoir le jardin de M. le comte de Solms. Sur quoy, ne restant plus rien à faire icy, S.A. trouva bon de gaigner temps et de passer encor aujourdhuy jusques à ceste ville d'Amersfort, où la bourgeoisie l'a receu en armes, et le magistrat aussi faict apprester un festin. Demain S.A. voudroit bien passer jusques à la ville de Hattum, qui n'est gueres moins de douze heures de bon et mauvais chemin, et y en a qui desconseillent ceste grande traicte. Mais il me semble que S.A. persistera en son dessein, qui le fera lever a cinq ou six heures du matin. Le temps est rude et orageux tout ce qui se peut .... Je reçois deux ou trois lettres par jour de M. de Harsolte, tant il se met en peine de bien faire accommoder les chemins d'Overijssel et Drente, afin que S.A. puisse veoir Coevorde, à quoy il semble qu'il y aura encor apparence. A Amersfort, le 17e de Novemb. 1640.
Auteursrecht onbekend