Briefwisseling. Deel 3: 1640-1644

2566. S. Van Haersolte. (H.A.)

D'heer Ripperda⁴⁾ adviseert mij, datte Munstersche regieringhe an haere Ho. Mo.^en hebben geschreven, datte selve d'executien op 't landt Linghen niet anders hadden gedaen als bij retorsie tegens t' gunt syn Hoecheit in Bevergeern was doende, daer die gemelte Munstersche eenighe documenten over gesonden hadden, d'welcke mette gemelte missyve gestelt sijn in handen van syn Hoecheit. Ende alsoe dit een goede saecke is, omdat men haer ongefondeerde ende onbehoerlicke proceduren soe claer als den dach sal kunnen doen blijcken, heb ick mijn devoir geachtet UEd. daervan kennisse te geven, ten einde d'selve believen wil bij sijn Hoecheit toe dirigeren, dat dit alles ten spoedichsten an mijn soen⁵⁾ alhier mach werden gesonden, om t' selve te debatteren ende dan an sijn Hoecheit wederom te senden. Zwol, den 6^en Novemb. A^o. 1640.

4) Zie II, blz. 21.

5) Rutger van Haersolte; zie I, blz. 376.