Briefwisseling. Deel 2: 1634-1639

1713. Aan prinses Amalia van Oranje. (H. A)*

J'apprehende que V. Alt.^e ne se lasse de m'entendre tant parler de nostre galerie, sans que je luy puisse mander qu'elle avance autrement qu'elle ne faict. De vray Son Alt.^e s'en fasche et crie tous les jours, de n'avoir jamais veu si mal travailler qu'on faict icy. La nuict d'hier on avoit assez bien restabli ce que l'enemy en avoit ruiné, mais ceste derniere nuict ceux de la ville s'estants advisez d'allumer de certains grands feux d'un costé et d'autre de la pointe du bastion, on n'a rien peu avancer, au prix qu'il appartenoit de faire, dans une clarté, claire comme le midy. Mais aussi on trouve, que Mess.^rs noz canoniers endormiz sont demeurez en faulte d'estouffer lesdits feux à coups de canon, qui estoit chose bien aysée. A cela on va donner ordre, et qu'au reste toutes choses puissent aller à plus grand pas qu'elles ne font. Dans le quartier de M. le comte Guillaume au contraire on advance extremement les galeries par des six pilliers toutes les nuicts, qui est une belle diligence.

Du costé de l'enemy nous sçavons qu'on persevere tousjours au dessein et en l'esperance de jetter des gens dans Breda, et particulierement, qu'ils en veulent aux digues, qui arrestent une immense quantité d'eau contre ce quartier, s'imaginants - et non sans fondement - que par occasion d'un percement d'une de ces digues, qui ne pourroit moins qu'inonder la pluspart du quartier, et rendre noz approches infructueuses, il y auroit moyen d'en effectuer quelque chose. - Les trouppes destinées à cest exploict, seront tirées de six regimens que le Cardinal Infante, en partant vers Hainault, aveq le reste, le 17^e de ce mois, a laissez au Demer, soubs le marquis de Lede, non sans grande contradiction de plusieurs des coronels, anciens en charge plus que luy. Des hier au

[p. 313]

soir on a faict sortir des parties de cavallerie vers ces quartiers là, pour apprendre s'il s'y faict quelqu' assemblée à semblable effect. - Le Cardinal Infante a faict entrée solennelle dans Bruxelles, depuis ses deux victoires, et au sortir de l'eglise, s'en est aller trouver la Reine Mere¹⁾ - que les Espagnols pardelà appellent La Rouïna madre, à cause de la grande despense qu'il y faut mettre - et ayant renvoyé tous ses chevaulx de selle, n'en est parti qu'en carosse sur le tard. - Enfin toute la grande armée qu'il mene vers le Hainault, au secours de Piccolomini²⁾ et Balançon³⁾, à Mons, ne monte qu'à 2300 hommes de pied, et 43 compagnies de cavallerie, faisants quelques 2000 chevaulx. Il reste à veoir quelle mine leur feront les Françoiz, qui par avance ont perdu en un instant leur bonne conqueste de la ville d'Ivois et Lutzenbourg, que M. de Chastillon⁴⁾ avoit forcé par le siege formel de quinze jours, et maintenant a esté reprinse en une nuict, par escalade, conduitte par Don Andrea Cantelmo⁵⁾, colonel italien, qui le 14^e de ce mois y a mené 1000 que mousquettaires qu'arquebusiers à rouët, a surpris le gouverneur et faict main basse à 450 hommes de la garnison, outre les deux compagnies de cavallerie, canon, drapeaux, estandarts et tout prins, aveq ce qui arrive d'insolence en semblables occasions. Devant Breda, le 22^e de Sept. 1637.

1) Maria de Medicis.

2) Zie blz. 243.

3) Zie blz. 273.

4) Zie blz. 11.

5) Zie blz. 273.