1683. Aan prinses Amalia van Oranje. (H.A.)*
Je regarde tout autour de moy, et ne trouve rien qui vaille la cognoissance de V. Alt.e, si ce n'est qu'elle daigne prendre en gré ces trois paroles, par où je luy diroy, que la garnison de Rurmonde, ayant esté envoyée à Grave, on la va repartissant en diverses garnisons; qu'hier on commença à citer au son du tambour les capitaines et gouverneur de Venlo, pour achever ceste formalité en trois diverses fois, de quatre en quatre jours, et proceder alencontre des defaillants, comme de droict et justice; que noz deux galeries se trouvant louëes depuis hier, les quatre premiers pilliers en sont desjà posez au declin de la contrescarpe du costé françois, et que les bateries qui la doibvent favoriser, s'acheveront apparemment dans demain, tout sur le bord du fossé; et finalement, que M. le comte Guillaume, apres une de ses mines esventée, en a refaict une seconde, apres l'effect de laquelle - qui sera peut estre dans une heure - il va faire donner l'assaut à sa corne. S'il y arrive chose de consideration, je ne manqueroy d'en advertir V.A., qui me pardonnera, j'espere, ceste briefveté, puisque c'est à faulte de matiere que j'en use contre ma coustume. Devant Breda, le 10e de Sept. 1637.
Auteursrecht onbekend