De drucker tot den lesers. der lieflijcker Poesie.
ICk vertoone u (Waerde Liefhebbers) een nieu Boec, van den Edelen Heere Ian Baptista Houwaert beschreven: niet nieu ten aensien der Materie, en des Auteurs, nochtans nieu, om dat t'selve noyt, voor desen aen den dagh en is gecomen, ende het was geschapen, noyt en soude gecomen hebben, ten ware, ic wonderlijck totte Copie, deses soo uytnemenden Wercke ware gheraeckt. Ick was ooc versekert, dat den Liefhebbers dit selve soude aenghenaem ende behaeghelijck zijn. Want so Alexander de Groote sodanigen vermaeck ende behaghen ghehadt heeft, int lesen van den Poeët Homerus, dat hy hem over al mededraghende, onder zijn oorkussen plagh te legghen, daer hy nochtans niet dan van fabuleuse vermakinghen handelt, soo behoorde ons veel meer de dapperheyt, gheleertheyt ende Godvruchticheyt deses soo weerdighen Mans te behagen, diewyl dese zijne Boecken niet anders zijn, als inleydinghen ende aenradingen totte deught en oprechticheyt, ende gheeft alsoo niet min geleerdelijck als vermaecklijck, de blosende en groene Ieught, een spoore ende prickel tot het lesen van veel treffelijcke dinghen, jae niet voorby gaende, wat eenichsins tot verlichtinghe ende vercieringhe des wercks soude moghen dienen: Soo dat men het selve te recht by eenen Bloempot of wel ghemaeckten Ruycker mach verghelycken: Want ghelijck dieselve als in een hoff, uyt allerley beddekens ghenomen, en de fraijste bloemen, Rosen, Lelien etc. onder een gheschakiert ende ghevlochten wort, om den heerlijcken reuck, ende glants onser lustgierigher ooghen te vermaken: Soo machmen dan met meerder waerheyt van onsen Houwaert segghen, dat hem niets ontbroocken heeft, om desen zijnen Bloempot ende Ruycker, als een goet Hovenier opt lieflijckst ende behaghelijckst te vercieren ende op te proncken. De Materie ende de stoffe deses wercx sal u genoegh de waerheyt daer van openbaren. Coomt dan O liefhebbende Ionckheyt ende doorsiet hoe cloeckhlijck ons den Generalen loop des Werelts van onsen honigh vloeyenden Poeët in ses stichtelijcke Boecken vervat en beschreven is, ende leert daer uyt neerstichlijken, wat ghy in dese onghestadighe ende verganckelijcke Werelt sult hebben te vlieden ende naer te volghen.
W.I. Stam.
Auteursrechtvrij
