Horae Belgicae

[p. 333]

CCXV.
¶ Een nyeu liedeken Vanden haselaer

HOort ghi ghildekens alle
Heere vrouwen ofte knecht
maye, Griete, Lijse, ofte Kalle
Den haselaer es op gherecht
Ghy moet v alle bereeden
En hebt toch gheenen vaer
Alle ghi quade beleeden
Om te comen inden haselaer
Moniken nonnen baghinnen
Ghy lollaerts ghy moet al me
Wilt v totten haselaer pijnen
Al om die beste ste
Hoort ghi een woordeken spreken
Tsteckt v al inden crop
Ghy sullet noch wel wreken
Dus loopt al inden top
Coopluden ambachters poorters
Maect v alle bereet
duerwaerders ende muylstoters
Den haselaer es so breet
Trompetters fluyters tamboeren
Nv loopt al paer en paer
die ghaeren den elleboghe roeren
Loopt inden haselaer
Vrou vuyle ende laudate
Loopt vry te dansse onueruaert
Weest tsauons laet opt strate
Tgaet te vastelauont waert
Laet vry v werck legghen
Weest vrolijck als nv ter tijt
Wilder v yemant toe segghen
Den haselaer es soo wijt
Ghesellekens van auontueren
Meyskens maect gheen achterblijf

[p. 334]

 

mach v wat goets gebueren.

 

Auontuert het achter lijf.

 

Al willen v ouders kiuen

 

En achtes niet een haer

 

Wilt by v boelken blijuen.

 

Oft loopt inden haselaer

6.

Ghy moet v alle ghereeden

 

die ick niet ghenomen en can

 

Daer schuylen so veel quaey beleeden

 

Tusschen wijf ende man

 

Tsauons zijn wi droncken

 

Tsmorghens es die keele drooch

 

Het wijf gaet dan proncken

 

Den haselaer es soe hooch

7.

Als dese ghehoude vrouwen

 

Tsmorghens vroech op staen

 

Jnt wijnshuys machmense schouwen

 

Si souden te vleeschuyse gaen.

 

Als die mans dit hebben vernomen.

 

Sijn wijf drinct den wijn tes claer.

 

Als die vroukens thuys dan comen.

 

Den man is inden haselaer

8.

Sotten wat mach v gebreken

 

Sottinnen hebt goeden moet

 

Als v die wespen steken

 

Loopt inden haeselaer metter spoet.

 

Die gaeren metten lenden wercken

 

Compt doch metten hoop

 

Papen ende clercken

 

Die nooten zijn goeden coop