Horae Belgicae



[pagina 194]
CXXVIII. ¶ Een nyeu liedeken. 1.[regelnummer] O Lustelike mey ghi zijt nv in saisoene Schoon ende groene die vogelkens singen nacht ende dach. Dies ic wel mach Sonder verdrach aensien reyn ooge opslach Van myn lief coene Haer liefde macht mi veel te doene 2.[regelnummer] Jnt velt staet menichte van bloemen Wie soudese sommen Hoe lustelic dat gersseken wter aerden spruit Loof ende cruyt Gheeft nv virtuyt O mijnder herten iuyt Verblijt den dommen Een troostelic woort laet lief van v commen 3.[regelnummer] Schoon lief ghi zijt die liefste creatuere. Mijns leuens duere Blijue ic gestadich tot in mijn doot Reyn lief minioot Troost mi tis noot die mijn herte doorschoot. Reyn maget puere Om uwen troost ist dat ic labuere 4.[regelnummer] Schoon lief ghi acht mijn woordekens cleene Dies ic in weene Blijue ic met drucke so seer doorwont Ghi zijt diet doet Schoon beelde soet Verhuecht sin ende moet. Met uwen troost reene Worde ic verblijt door v alleene 5.[regelnummer] Princersselic greyn, wien ick geerne aenschouwe Blust mijnen rouwe Laet mi arm dienaer troost ontsaen. Reyn vrouwelijc graen Hoort myn vermaen Laet mi in v gracie staen. So sal ic met trouwe V dienen lustelijcke vrouwe