Horae Belgicae

LXIV.
¶ Een amoreus liedeken.

HOe coemt dat bi scoon lief laet mi dat weten.
Dat ghi nv mi, vol drucx laet ongemeten
Ghi wist dat wi, wisten venus secreten.
Noch meer weet ghi, hoe moechdijt vergeten.
Seer opstinaet, sidy van uwen sinne.
Oft quaden raet, is v ghegeuen inne.
Dus sterue ick wt liefden, door v minne.
Goddinne fier, vol gauen oueruloedich
V dienaer hier, bidt met tranen bloedich.
Jn wat quartier, ghi triumpheert voorspoedich
Och coemt doch schier, aensiet mijnen dienst ootmoedich
Jc en beghere gheen verdrach, bi siecken noch gesonden.
Mer nacht en dach, v dienaer tallen stonden.
So coemt schoon lief, ende salft mijn doloreuse wonden
Bloeme minioet, oorlof tot allen tijden.
Snoots nopen groot, coemt mi fellic bestrijen
Venus conroot, waer door ic come in lijden

[p. 96]

 

Sal na myn doot, een ander meer verbliden.

 

Myn lichaem weert gedoot met venus brande

 

Dootuerwich en bleec, neemt voor een offerhande

 

dus stel ic lief myn lijf, ende siel te pande.

4.

O mannelic greyn, mi deert v lamenteren

 

Myn liefde reyn, moet ic bedwongen regeren.

 

Menighen vileyn, fenijnich int hanteeren.

 

Soude certeyn, onser beyder liefde blameren

 

Dat waer v leet, v vuecht die geest orconde

 

Jc weet besceet, al wt mijns herten gronde.

 

Streft niet schoon lief om mi, ghi zijt mijnder herten ghesonde.

5.

Schoon lief v spoet, is mi een bitter brine

 

ic soude v myn bloet, scencken voor medecine

 

sidy desen onuroet, so sterue ic door die pine

 

door dwesen soet, van uwen claren aenschijne.

 

V dienst eerbaer, vast in myn hert ic houwe

 

Mer tvalt mi swaer, dat ghi zijt ongetrouwe

 

Sterft niet schoon lief om my, ick blijue v eyghen vrouwe

6.

O swaer torment, dat ic moet deruen

 

V aenschyn claer yent, och mocht ic met v steruen.

 

V lichaem excellent, sal ic tot eender eruen.

 

Tot mineniaren volent, bewenen menichweruen

 

v groot miskief, ben ic certein onsculdich

 

Dus weest schoon lief, in v lijden verduldich.

 

Ende bidt voor mi, voor daenschyn gods drieuuldich