Logo DBNL
Gedichten (1981)

Gedichten

(1981)–Willem van Hildegaersberch–rechtenstatus Auteursrechtelijk beschermd

Vorige Volgende

+XCII. Van feeste van heren.

 
Salomons woert dat wil ic prisen,
 
Tot onser leer een deel bewisen;
 
Wanttie scrifte van hem hout
 
Boven sulver ende gout,
5
Boven steente, boven crude,
 
Boven al dat ic bedude
 
Of mach bewisen inder tijt.
 
Van des men pleecht ter werlt wijt+
 
Soe heeft hi sonderlinghe ghepresen
10
Weldoen ende blyde te wesen;
 
Want wye in weldoen hem verblijt,
 
Die schuwet archeit ende nijt:
 
Dat is die rechte pat van eren.
 
Hier om sellen hoghe heren
15
Op weldoen setten hoer begheren,
 
Soe moghen si blydelic hoveren.
 
+Soe wye in weldoen wort vermaert,
 
Die is rijckes loves waert.
 
Beroepen grote heren spel,
20
Dat comt den menen volke wel;
 
Want oerloghe, nijt ende swaer tempeest
 
Doen vergheten menighe feest,
 
Diemen pleghen sonde op aerde,
 
Waer dat nyemant leyt en daerde.
25
Wanneer die heren hem verbliden
 
Ende tot malcanders hove ryden,
 
Dan maken si pays, dan maken si vrede
 
Hem selven enten volke mede:
 
Dus wortet al in goeden hoghe.
30
Rust is beter dan oirloghe,
 
Op datmen die eer bewaren mach;
 
Mar als die goede gheen verdrach
 
En can ghecrighen vanden quaden,
 
Dan moetmen wisen ende raden,
35
Dattie palen sijn behoet.
 
Prijs van reynen vrouwen goet
 
Dat is een scat van hogher waerde;
 
Wantmen vint gheen dinc op aerde,
 
Dat mannes herte meer verhoecht
40
Dan eens goedes wives doecht;
 
Want rechte doecht van goeden wiven
 
Die en can men niet te vollen scriven;
 
Mar die hoer eer vercopen licht
 
Om myede of om clene ghicht,
45
Entan hem selven soe vergheten,
 
Dat sijs niet en willen weten,
 
Ende hem by goede vrouwen voeghen,
 
Twaer billics dat si bellen droeghen,
 
Die lude cloncken waer si ghinghen,
50
Soe hoordmen elcs bi sonderlinghen.
 
Die selve ondancbaer is van leven,
 
Al wilde hi prijs van weldoen gheven,
 
Sijn love is cranc, al heeft hi macht,
 
Die selve op tweldoen niet en acht.
55
Prijs van vrouwen is een dinc,
 
Daer noyt scalcheit in en hinc,
 
Want si gheven rechten lof.
 
Wanneer die heren houden hof
 
Ende der wapenen willen plien,
60
Na dien weldoen, dat si sien,
 
Soe wortet lof ghegheven daer:
 
Si nemen raet ende segghen twaer,
 
Als goede vrouwen toebehoert.
 
Dan roepen die eeranden voort+
65
Den danc als die vrouwen ramen,
 
Ende noemen overlunt bi namen
 
Wyet verdient nae wapen recht.
 
Sijn si heren, sijn si knecht,
 
Die horen tijt in weldoen bouwen,
70
Si crighen lof van goeden vrouwen
 
Ende vanden mienen volke mede.
 
Hi waer sot die anders dede,
 
Dan elc die boesheit van hem weert.
 
Ghi hoghe heren, soe begheert
75
Wel te doen u leven lanc
 
Sonder nijt of groot bedwanc.
 
Bedwanck dat is een onghenoecht,
 
Daer om heeft God den wil ghevoecht,
 
Dat elc mensch is sijn selfs vry
80
Te doen dat hem ghenoechlijc sy,
 
Op dats natuer hem wil ghehinghen,
 
Ende hijt mit reden mach volbringhen.
 
Denct om twoort van Salomon:
 
Blyde te sijn ende wel te doen,
85
Dat heeft hi sonderling gheprijst
 
Ter werlt ende oec te Gode wijst,
 
Datmen in beiden mach volstaen.
 
Hebben die heren wel ghedaen,
 
Sonden si dan niet blyscap toghen?
90
Want si sient voer horen oghen,
 
Hoe claerlijc dattet weldoen schijnt,
 
Al daer die goede om heeft ghepijnt:
 
Die bose en mintet weldoen niet,
 
Al ist dat hem eer gheschiet
95
Tenen tyden ofte twien.
 
Ghi hebt ghehoert, oec ist ghesien,
 
Hoeneer hi boesheit weder doet,
 
Dat hi die eer verliesen moet.
 
Volmaecte blyscap sonder gal
100
Die staet alleen opt weldoen al:
 
Sonder weldoen blyde te sijn,
 
Gheduertet langhe, twort venijn
 
In hem selven of soe quaet;
 
Mar blyscap die opt weldoen staet,
105
Die gheeft ons hier ghenoechte groet,
 
Ende tweldoen vintmen nader doot.
 
Hier om heeft Salomon gheseit
 
Dat weldoen ende vrolicheit
 
Te gader al in een bewant
110
Voor talre beste dat hi vant.

Vorige Volgende