Pest-spieghel

1. Handeling.
2. Verschoning.

Goed aert.

Hoe heeft 'tbegeeren quaedt des menschen hert vermant,

Daer ons de Heer met Pest so mercklick wil castyden
De meestendeel en soeckt zijn siel noch niet te vryden
Maer wel door eyghen baet tot schaed' zijns naesten tracht,
Om voeren met gheweldt des lichaems ydel pracht.
Het is al even eens als yder can bekinnen
Dat zy 'tvergancklick goet vergaren, hoe zijt winnen
'Tzy met onechte maet, oft woecker tot profijt
Men merct niet dat sulc winst tot meer verlies gedijt,
Doch wie zijn sinnen heeft, behoort wel t'overleggen,
Dat ons de lieve God dees straffe comt oplegghen

[fol. Avir]

 

Om onse sonden wil, mits dat het lichaem kiest

 

De goed'ren waer door dat de siel het haer verliest.

 

Men denckt niet dat de mensch heeft driederhande goeden

 

Van welck men schuldich is het best altijt te hoeden,

 

Der sielen goeden zijn onnoselheydt en deucht

 

De goetheyt en al 'tgheen daer God hen in verheucht,

 

Des lichaems goeden zijn de stercheydt vande leden,

 

Ghesontheyt en al 'tgheen het lichaem stelt in vreden,

 

Tot s'lijfs behoeve zijn den rijckdom, gunst en macht

 

Waer onder int gemeen ons arme siel versmacht.

 

Nu is de siel nochtans voor d'waerdichst' ons gegeven

 

Die suyverlic bewaert met vreucht doet eeuwich leven

 

Daer d'aertsche leven doch vol drucx is en soo cort

 

Dat dick de mensche sterft eer hy gheboren wort.

 

Waerom soo willen wy tot garen ons dan wennen,

 

Ja der natueren Wet soo heftich me berennen

 

Als wy een ander doen 'tselfd' doch sal als slijc vergaen.

 

Dies is 'tvergancklick gansch voor 'tminste goedt te achten,

 

Tbesmet seer lichtelic, men moet sich daer van wachten,

 

Ghesontheyt beter is dan have, goedt of gheldt

 

Wort by den Wysen oock in meerder staet ghesteldt.

 

Der sielen spyse doch, de deucht niet om verschoonen,

 

Is als ick heb gheseyt, daer boven noch te croonen.

 

Dus steld' ick my gherust doen my de tydingh quam

 

Van mijn gebleven schip, ick dacht God gaf God nam,

 

Al ist dat ick als nu het tijtlick heb verloren,

 

Wat heb ick hier gebrocht? naect ben ic doch geboren

 

Ben noch de rijckste man die hier op aerden leeft,

 

Zoo lang de Heer my vrijt en ons ghesontheyt gheeft.

 

Int sweet zijns aenschijns moet de man doch alle morghen

[fol. Aviv]

 

Naer Gods begeeren siet zijn huysghesin besorghen:

 

Maer holla wat is dit, k'en ben hier niet alleen?