Pest-spieghel

[fol. Aiijr]

Voorreden.

Menich slechtaert. Goet onderwijs.

Wel wat is dit? ick sien men sal hier weder spelen,

En sal den Heeren dit ten lesten niet vervelen:
Daer nu soo menich mensch soo swaren smerte proeft?
Jae meest de gantsche stadt so heftich is bedroeft
D'een om dat hy zijn vriendt siet door de Pest bederven
En d'ander om dat hy zijn eygen vrou siet sterven,
Sijn vrou zijn kindren me, o veel te harden slach
Om sulcke speelgeraes te brenghen voor den dach:
Wat dit bedieden mach en can ick niet versinnen.

Goet onderwijs.

Ick sie hier Menich slechtaert die sich ontstelt van binnen,

En seer becommert is om dat de const noch leeft,
Ja dat Rethorica sich op't Thoneel begheeft,
Dewijl nu menich mensch door siect' is in groot lyden,
Daer sich doch niemandt in en hoorde te verblyden:
Maer hem is noch den gront van't spelen onbekendt,
Midts dat hy savonts laet te loopen is ghewendt
Om't sotten spel te sien gelijckmen speelt ter feesten.

Menich slechtaert.

Ick wilde weten wel waerom doch dese gheesten,

Alsulcken stout bedrijf in desen tijt bestaen.
Holla daer comt soo't schijnt een deg'lick man gegaen
Dien sal ick't vragen af: Wat salmen hier bedryven?

goet onderwijs.

Y slechtaert lieve man laet doch sulck vragen blyven,
Ghy siet wel dat men hier om spelen is ghereedt,

Menich slechtaert.

Spelen? ic speeld' wel me waer ic daer toe gecleedt

Men hoort in dese tijdt doch 'selfd' niet toe te laten.

goet onderwijs.

[fol. Aiijv]

 

Nu hoortmen aldermeest alsulcx dick aen te vaten,

 

Door sware Pestendoch, ghelijckmen lesen mach,

 

Wert 'tspelen eerst ghebracht te Romen aenden dach

 

Op dat 'tbeswaerde volc hun herten mocht verlusten,

 

Te voor bedroeft, gestelt om in het graf te rusten:

 

Doch dat het Christlick zy te spelen 'tgheen ontsticht

 

Al wiert oock menich hert daer dicwils door verlicht

 

En staen ick wel niet toe, tis beter sulcx te staken,

 

Maer spelen 'tgeen den mensch de sinnen can vermaken

 

Daer neven leeren hoe hy God behaghen moet

 

Segghe ick te wesen nu en 'tallen tyden goet:

 

Dus staet, hoort ende siet eer ghy begint te spreken.

 

Menich slechtaert.

 

Aent hooren en salt my noch ooc aent sien ontbreken

 

Maer staen, ick ben te moe, dies ick my neder stel.

 

Goet onderwijs.

 

Hola, een weynich noch u hout als een ghesel,

 

Het mutsken inde handt moet sedich zijn ghenomen,

 

Soo lang men groet die hier om hooren zijn gecomen:

 

Waerde Heeren wijs int ramen

 

Schoutet, Burghemeesters me

 

Schepens die recht naert betamen

 

'Tkyven flist en sticht den vre,

 

Sessendertich deser Ste

 

En al die om hooren quamen,

 

God de Heer die voor ons stre

 

V 'tlang leven gun te samen.

 

Menich slechtaert.

 

Amen.

 

Goet onderwijs.

 

Datmen swyght bidden wy,

 

Oft ten minsten het luy spreken

 

En het tongheraes wat my,

 

Tot dat 'tspel gansch is deurkeken:

[fol. Aiiijr]

 

Soo dan 'tselfd' yet mach ontbreken

 

bidden me dat elck ons vry

 

Voor de strenghe Momi streken

 

Die den Gheest brengt inde ly,

 

Menich slechtaert.

 

Dit soo zy.