Emblemata. Vol-sinnighe uytbeelsels

Embleme 76.
Non semper arcum tendit.

Hy die wat goets of groots te doen heeft voorghenomen
Daer over hy dan soeckt tot een goet eynd te komen,

Altijt niet blocken moet oft wercken sonder rust

Maer mede sien dat hy te met den geest verlust:

Ghelijck Apollo die om 'therte te verlichten,
Den booch ontspannende, verlatende sijn schichten,

Op Helicon in't groen syn iaghen heeft ghestaeckt

En met syn Herp oft Luyt hem selven soo vermaeckt.