Emblemata. Vol-sinnighe uytbeelsels

Embleme 50.
Hodie mihi, cras tibi.

Daer is ter werelt niet dat niet en kan bederven
Daer is ter werelt niet dat leven heeft sal sterven,

'Theeft alle synen tijt ghelijck de bloem int velt

Of als die kaerse die ontsteken is versmelt:

Hoe sterck of wel hoe iongh de Mensche sy in't leven
D'een voor en d'ander nae moet sich ter doot begheven,

'Tis heden mijnen dach ick sal u voore gaen

En morghen desghelijcx soo ist met u ghedaen.