Emblemata. Vol-sinnighe uytbeelsels

[fol. A1v]

Edelen Erentfesten Ioncker Iohan van Meerten van Abcoude.

ICk sien op aerden hier heeft d'een syn welbehagen
In Bosschen Bergh en Dal te vliegen en te jaghen,

Een ander sal met lust ten strijde moedich gaen,

En sonder vrees om d'eer met synen vyand slaen,

De derde quelt hem selfs by daghen en by nachten
Vytstortend' om de Min beweeghelicke klachten,

Den vierden om tgevvin soect men'ge vreemde ree

Doorvarend' in't ghevaer, de sture soute Zee,

De vyfde blyft by 'tlant en sal syn sinnen legghen
(Om meeren syn besit) aen't bouvven ploegen eggen,

De seste soot behoort al d'oeffeninghen mint

Maer boven alle tot Minervam is ghesint,

Hier toe strect uvven sin van Meerten t'allen stonden
Daerom heb u dit Boec toe t'eygenen goet gevonden,

Op dat ghy niet alleen daer in meucht scheppen lust

Maer dat het selue mee zy onder u in rust,

Bevryt van Zoili spitsvind'ge laster streken
Neemt het dan goedich aen bedecket syn ghebreken,

Tot dat wat beters meer daer by noch werd gedaen

En d'een met d'ander soo te beter door mach gaen.

V. L. Vrient,

Zacharias Heyns.