Const-thoonende juweel

[fol. Tt3v]

[Het Galis-blomken van Haestrecht]

Haerlem tot die van Haestrecht

PAulus Emilius Roomsch Hooftman hebbende als den vromen
Den Coninck Perseus gevanghen en zijn lant becracht,
Des hy als cloec verwinner sijn incomste de binnen Romen
Heerlijck inrijdende met grooten lof, pomp en pracht.
Hoe feestelijck hy wert ghetoeft en op't Capitolium gebracht:
Hoe blijd'lijck ghewelcomst, soo tuycht doch mijn gheweten,
Dat met gheen minder begeert ick u comst heb verwacht:
En dies immers soo welcom sijt, door jonst onghemeten,
O Galis-blomken die uyt liefde versocht, u wel hebt gequeten.

Antwoordt.

Wy dancken u seer lof-trouwe Pellicanisten,
Vande eerlijcke reverentie die ghy ons aendoet,
Ende dat door liefde, die noyt de rechte baen misten,
Bewesen natuerlijck aenden Pellicaen soet,
En noch claerder in Christo, wiens ghestorte bloet
Sijn ledekens verstijft, wie sou willen wijcken?
'tGalis-blomken wenst, uwer eeren Stadts voorspoet,
Ende 'tlangduerich welvaren uwer trafijcken:
Want 'tis uyt liefden versocht, dat Trou moet blijcken.