Const-thoonende juweel
(1607)–Zacharias Heyns–
AuteursrechtvrijBij de loflijcke stadt Haerlem, ten versoecke van Trou moet blijcken, in't licht gebracht
[Folio X1v]
| |
Op de voys Eylaes liefde u cracht.
Christus het hooft voorwaer
Sijnder ghemeenten claer
Heeft ieghelic lidt
Ghestelt in sijnen staet,
Op dat in lijden swaer,
d'Een d'ander openbaer,
Wt reyn liefde wit
Soud' helpen vroech en laet,
Waer van het hooft niet slecht
Eerst gaf 'texempel recht:
En seyt ghy wert bekent,
Mijn Jonghers excellent,
Zoe in u is ghehecht,
Liefde uwes Broeders ient.
| |
[Folio X2r]
| |
Wilt daerom alte samen
Elck naer hy is bequaem,
Als leden ghetrou
Soucken d'een d'anders eer.
Ghy leeraers sonder blaem
Predickt des Heeren naem
Tot boet en berou
Beroept de leden teer,
Die benout zijn vray gheeft
Verslaghen en bevreest
Gheeft troostelijck confoort,
Acht op u en op 'twoort,
Ghy sult behouden meest
Den ghenen die u hoort.
Ghy die gheseghent en wijt
Met tijtlijck goet hier zijt,
Begraeft niet uwe pont
In d'aerde daert doe geen vrucht
Maer u ghetroulick quijt
In uwen staet altijt:
Dats dat ghy den mont,
Van u broeder die sucht,
Overmits honghers noot,
Deylt uwe spijs en broot,
Of anders 'tcan zijn niet
Dat in u is ghebiet,
De liefde Christi bloot,
Dus u broeder aensiet.
Want die sijn room hier draecht
Dat hy naer Christum vraecht,
Ende toont hem fel
Teghen sijn leden mat,
Niet loghent hy behaecht
Hem selfs, en sal gheplaech
Voor sijn daet rebel
Hier namaels worden plat,
Dus door 'tgeloove goet
Werckend' in liefden soet,
D'een d'ander helpen wilt,
Verdragende oock milt
Malcanders fault ghy moet,
Soo blijft onmin ghespilt.
Prince.
Want u hooft Princen al,
Quaem neder in dit dal,
Vernedert ghelijck
Een dienstknecht in't ghesicht
Rechtende vanden val,
V leden goot en smal
Daer ghy inden slijck
Der sonden laecht verplicht,
Ende gaf u een wet,
Dat ghy d'een d'ander met
Soud' helpen dach en nacht
Naer u vermooch en macht
Dat doe tsoo sult ghy net
Hier naer Aensien Gods cracht.
Aensiet Gods cracht. |
|
