Const-thoonende juweel

Bij de loflijcke stadt Haerlem, ten versoecke van Trou moet blijcken, in't licht gebracht

[p. 23]

De Orangie Lelie van Leyden,

Vlaemsche Camer tot Leyden.

In liefden groeijende

[p. 24]

Presentatie.

O uytvercoren maecht beroemt in dese landen,
Ons groete met ootmoet wy jonstich u aenbieden,
Met recht doch eeren u de cloeckste van verstanden
Want groote vruchtbaerheyt men door u siet gheschieden,
Sijnd' als een schoon Leyd-ster van veel verblinde lieden,
Die d'onwetenheyt track in duyster schaduwe swaer:
Hoe soud' men uwen glants met rechte connen vlieden?
Als ghy niet dan dat sticht, ons brenght in't openbaer.
Dus om u weerdicheyt, O reyne Maghet claer,
Te schincken ons Blasoen, wy jonstich t' uwaerts keeren,
Tis een grondich bewijs, hoe Man en Vrouw' eerbaer
te saem leven in echte inde vreese des Heeren,
Die groeysaem zijn in liefd', naer der Propheten leeren:
Ia als een vruchtbaer Boom staend' aenden water cant,
met zoeten zeghen ryck wil Godt haer zaet vermeeren
steeckend over haer uyt syn zeghen rijcke handt,
Elck thoont bequaeme vreucht, als vast grondich gheplant,
En onser Blommen stam, in't midden staend' al bloeyende,
Oranghi van coluer, waer oyt men deucht by vant.
Hier med' Rhetorica is jonste t'uwaerts vloeyende,
Ontfanght danckelick dit, van ons In liefden groeyende.

Noyt Clerck volleert.