Memorieboek der stad Ghent van 't jaar 1301 tot 1793. Deel 2

1546.

Commissarissen.

Mer Adriaen de Croy, grave van Reux, gouverneur ende capitain-generael van Vlaenderen, enz.

Mer Loys van Heilweghen, ruddere, president van Vlaenderen, over mynen heere van Praet.

Jan van Roden, ontfanghere generael van der Ayden van Vlaenderen.

Mer Hughes van Grammes, ruddere, heere van Wynghene.

Schepenen van der Kuere.	Schepenen van Ghedeele.
Joncheere Claeys Triest, heere van Auweghem.	Jan de Vos.
	Meester Jan de Stercke.
Jan Ruffelaert.	Symoen van der Haghe, heere van Gotthem.
Jan Salaert.
Bertelmeeus van de Putte.	Jan van Hembyse, f^s Willems.

[p. 242]

Meester Joos van Grijspeere.	Joos van den Eede, over hem Jacob Cabillau,
Willem van Lake.
Jan van Hembiese, f^s Bussaerts.	Jaspar van Riebeke.
Meester Joos de Grutere.	Michiel de Vriendt.
Loys van Morslede.	Lievin d'Hooghe.
Lievin Prijsbier.	Anthuenis Colpaert.
Lievin van Casele.	Adriaen de Wale.
Eloy de Sceppere.	Jan de Hertoghe, de jonghe.
Jan Baers.	Franchois Curthals.
	Willem van Cuelene.

Ontfanghers.

Joos Donaes, tresorier.

Jacob Goetghebuer, van de wercke.

Jan de Buck, van de Yssuwe.

Item, in dit jaer ende scependom galt de taerwe vij schellingen vi deniers grooten, ende ooc viii schellingen grooten 't halstere, ende djaer hier te vooren had seer dieren tijt gheweest, ende eer den ougst quam, galt de tarwe meer dan neghen schellingen grooten 't halstere.

[In dit jaer was groote dierte van coorene, ende van Kersmesse voort wart de dierte lanxst zo meerdere, zo dat men voor den ougst de tarwe cocht xviij schellinghen den sack, ende de rogghe xiij schellynghen gr. ghentsche mate, ende het moeste al commen van Oostwaert ende van beneden, daer mede dese landen ende steden ghespijst worden; want van Doornick, Rijssele, Douay, Arien ende alle andere steden van daer 't selve plach te commene, daer was de dierte noch veel meerdere; want het cooren moeste van hier derwart varen ofte zy zouden van hongher vergaen hebben, sodat de gonc die van Paris quamen storven van grooten hongher ende ghebreke; want al hadden zy ghelt,

[p. 243]

zy en hadden gheen coorne nochte broot, ende daer men 't te coope vont moeste men 't by provisie deelen. (Pr. Ar.^B.)]

Item, ontrent der Ougstmaent lach de keyser ende de grave van Bueren in de duutsche landen met grooter macht; maer men en mocht in dese Nederlanden niet segghen wiesser ghebuerde.

Item, den vij^en in Ougste, ende was saterdach 's avonts ten xi ueren, beghonste 't seer te donderen ende te blicxemen, soo dat te Mechelen groot ongherief quam; want de blicxem gheraecte in eenen turre met buspoere, daer groot jammer ende ongherief af ghesciede, daer wel half de stede af bedarf.

[Den vij^en dach van Ougste saterdachs voor Ste Laurensdach, 's avonts omtrent de x of xi uren, ghebuerde binnen Mechelen ende der omligghende plaetsen zeer groote jammere van schaden van dondere ende blixeme; welke blixem, soo 't Godt ghedoochde, quam up de Santpoorte, in de welcke groote ghetale van tonnen buspoers lach met noch andere munitie van oorloghe, ende de blixem in 't buscruut commende, er word berrende, so dat de turre barst, ende dede de gheheele stede beven, zo dat niet alleene de selve turre averecht en viel, maer waren uutgheworpen de fondamenten van den zelven turre, van welcken sulc een jaer ghecommen es dat in deze landen 's gelijx noynt ghesien en es gheweest; de gheheele Neckerspoel es byna gheheel af ende gheschendt; boven dezen zijn de naervolghende cloosters, straten ende huusen bedorven: dat gheheel hof van Beerghen, Ste Pietersprochie byna gheheel af, 't hof van vrau Magriete derghelijcke, 's Keysershof gheheel wech ende bedorven, de gheheele Lombaerde bedorven, der Postmeesters huus gheschent,

[p. 244]

ende de stal metten peerden wechghesleghen, het Augustynencloostere eensdeels gheschendt, de Voochtstrate gheheel af, het hof van de Hoochstrate gheheel af, duer welcke steercte van den hove met dat daer resteerde behilt den gheheelen houck van der stede, nochtans zijn er weynighe huusen onbeschadicht bleven, hoewel dat menich meynsche, duer de steercte van den hove, zijn lijf behauden heeft. Daer zijn boven dese voorscyde hoven ende plaetsen ontrent vij^c huusen bedorven. Op den sondach morghens zijn der ghevonden bet iij^c meynschen doodt, zo mans, vrauwen ende kinderen, ende men heeft groote putte ghemaect ende de doode met waghens daer in ghevoert, dwelck groot jammer was omme aensien; daer was er noch wel hondert ende vijftich ghewondt ende in 't gasthuus ghebrocht. 't Es ooc ghebuert up den zelven tijdt binnen Mechelen, up den houck van Ste. Beernaertshof, dwelcke was een heerberghe, ende de weert was gheheeten in de wandelinghe Crocs, dat daer sommighe gasten hebben sitten dryncken in diversche ghelaghen, onder andere es er een ghelaghe gheweest, die met elcandere hebben sitten spelen met quaerten, cloppende om bier, es de weerdinne gaen tappen, ende dewyle dat zy tapte es de principale slach ende donder gheweest, zo dat het hus, omverre ghevloghen es, ende de speelders doot bleven metten quaerten in de handt, zo zy saten ende speelden, ende alle het ander gheselschip es doot bleven, behaudens de weerdinne die, overmidts de vaulte van den keldere daer sy bier tapte, ghesolveert bleef; ende binnen derden daghe es er een man vonden in eene speloncke van eene vaulte onbeschadicht, die vraechde of de weerelt noch stont, ende men vont er een kind om dryncken roupende,

[p. 245]

ende eene vrauwe in de Blockstrate, upstaende om haer venster te luucken, es, op een velleken naer, haren hals afghesmeten, ende daer ghebuerde noch veel wonders dat hier, om curtheyt, niet gheschreven en is. (P. Ar.^B.)]

Item, in dit jaer den xix^en in November ghesciede grooten brant binnen Andworpen ontrent de Nieu Busse.

Item, den xxvi^en in Lauwe staerf de coninc Heindric van Inghelant.

Item, in dit voornoemde jaer in Maerte staerf de coninc Franchoeis van Vranckerijcke.

Item, up Sente Joorisdach quam mevrauwe de regente binnen der stede van Ghent, ende up den Meydach was te Ghent processie generael om dat men verstaen hadde dat de keysere victorie gehad hadde jeghens syne vyanden.

Item, den tweeden in Meye dede mevrauwe de regente een costelicke uutvaert doen over den coninc van Vranckerijcke Franchoeis, tot Onse Vrauwenbroêrs.

Item, den derden in Meye, gaf mevrauwe der wet van Ghent te kennene hoe datse seker tydinghe ontfaen hadde als dat op den xxiiij^en in April, op eenen sondach, de keyser eenen slach ghewonnen hadde, ende dat de hertoghe van Sassen ende de lantgrave van Hessen ghevanghen waren, ter welcker causen dat scepenen van Ghent ordoneerden veel scoone prysen die te winnen waren met scoonst te vieren, soo dat men 's avonts binnen Ghent veel scoone vieren maecte ende met tortsen ende andersints in veel straten ende ghebuerten, de vier cameren van Rhetorijcke speelden te veele plaetsen, ende alle de clocken van Ghent luudden 's avonts van viij^en tot den ix^en ueren in alle kercken van der stede.

Item, den vierden in Meye dede mevrauwe de regente

[p. 246]

een scoon uutvaert over den coninc van Inghelant Heynderic, van ghelijcke 't Onse Vrauwenbroêrs.

Item, den vj^en in Meye reisde mevrauwe de regent, naer de stede van Andworpen.

Item, in dit jaer was ghemaect de nieuwe caeye bachten de Freerminueren, te wetene van der Freerminueren-brughe tot den Cuupgate, dwelc eene gerieflicke sake es om den coopman synen wijn ende ander goet te lossene ende te scroedene, om duer de stede te voerene, welcke plaetse nu daertoe gheordineert es.