Memorieboek der stad Ghent van 't jaar 1301 tot 1793. Deel 1
(1852)–Andreas van Heule–
Auteursrechtvrij1379.
Item, in dit jaer rees de orloghe seer fellic tusschen grave Lodewijc van Male ende der stede van Ghent; daer was grote beroerte, want 't ghemeente track ute ende beleyde eenen grooten deel edelmannen binnen Audenaerde, ende daer was paeys ghemaect tusschen den heeren ende 't ghemeente, ende de paeys hilt inne dat men al Vlaenderen duere zaude maken nieuwe wetten, ende daer waren te Ghent ghemaect nieuwe kiesers ende nieuwe schepenen op sente Thomaesavont voor Kerstmesse; want de sche- | |||||||||||||||||||||||||||||||||
[pagina 106]
| |||||||||||||||||||||||||||||||||
penen waren verlaten van den grave Lodewijc naer d'inhauden van den paeyse. Daer waren kiesers van 's heeren weghe: Bauwin de Berre, Zanders Conte, Bauwin van Ravescot ende Pieter de Rijcke. De kiesers van der stede weghe waren: Jan Boele, Claeis van Lippenhove, Matijs de Dryvele (de Winckele) ende Jan Permeelen (Perroete). [Anno xiijclxxix dede de grave Lodewijck maecken de posteerne, daer hy wonderlick huys hielt ende seer costelick met jonck geselschap, ende hy en hadde by hem gheene edellieden noch wyse persoonen, ende hy en liet hem niet ghesegghen; maer nam in synen raedt jonghe lieden die spelen en dansen consten, ende dit en ghenoechde die van Ghent niet wel; want om sijn leven te onderhauden hadden hem ghegheven twee reysen settinghen, ende al wat hy begeerde; die van Brugghe gaven 't hem ende sy versochten van hem 't ghedelf van de Leye tot Deynse, ende de raedt van Ghent ontseyde het hem. (Bibl.)] [In dit jaer quamen die van Brugghe en van het Vrye ghevangen binnen 's Gravensteen die alle gheexecuteert werden. (S.G.) - Den xij Hoymaent waren te Ghent vijftich persoonen onthooft. (S.G.) - Die van Ghent beleyden Dermonde, Aelst, en wonnen Audenaerde, ende den 1en December was de peys ghemaect te Mechelen. (G.) - Item, in 't selve jaer up sente Pietersdach in sporckele quamen die van Ghendt subtilijcken in Audenaerde by der versuymenisse van der wacke ter poorten, ende quamen ter maert ende vernieuwde de stede, sloeghen veele edelen doodt van 's princens volck. (K.M.)] | |||||||||||||||||||||||||||||||||
[pagina 107]
| |||||||||||||||||||||||||||||||||
Item, in dit zelve jaer was 't casteel van Wondelghem verberrent, zoo dat maer en stont x jaer, daer uut dat de oorloghe rees al Vlaenderen duere, en om de delvinghe van der Leyen, dat die van Brugghe deden; ende doen op dien zelven tijt was doot ghesleghen te Ghent op den cautere de hoochbailliu van Ghent omme segghewoorden dat hy tot den volcke zeyde. [Item, in dit jaer was doodt gheslaghen up den cautere mer Wauter van Autryve, hoochbailliu van Ghendt. (K.M.) - In dit jaer rees orloghe tusschen die van Ghendt ende Brugghe om het ghedelf. (S.G.) - In dit jaer scooten die van Leuvene heurlieder officiers ter veinster uyte op de strate. (S.G.) - 6 Septembris, was doot gheslegen Wauter van Outrive, hooghbailliu van Ghendt, om dat hy last gaf Pieter de Coene, 's heeren cnape, te vanghene eenen witten capproen; hier uut rees een wapenynghe ende duerde vi daghen, ende doe waerter ghecoren eenen capiteyn, Jan Yoens, ende trac met 2000 volcx te Deynse, t' Aelst, Deermonde. Desen Jan Yoens bracht alle de steden van der casselrie van Ghendt binnen eender maent zoo verre dat zy eedt deden der stede van Ghendt, uutghedaen Audenaerde, ende in 't huuswaert commende quam over Eecloo, daer hy waert vergheven, en starf en ligt er begraven; hier was in Ghendt grooten rauwe om de voornoemde doot. (Bibl.)] Item, hier naer volghen de tweeste scepenen van den jare XIIIcLXXIX voornoemd:
| |||||||||||||||||||||||||||||||||
[pagina 108]
| |||||||||||||||||||||||||||||||||
Item, in dit scependom waren te Ghent vijftich lieden onthooft. Item, in dit jaer voornoemd was Aelst ghedestruert. | |||||||||||||||||||||||||||||||||