Memorieboek der stad Ghent van 't jaar 1301 tot 1793. Deel 1

1319.

Schepenen van der Kuere.	Schepenen van Ghedeele.
Jan Utendale.	Boudyn van den Kerchove.
Gillis van Oosterzele.	Jan Mabensone.
Seghere de Groote.^2	Heynric van der Hoyen.^6
Simoen van den Briele.	Lievin van Astene.
Sanders Mond.	Jan Steppe.
Thomaes van Huse.	Michiel Deynoet.
Simoen Tryl.^3	Jan van Eeke.^7
Claeys van Leuceghem.^4	Jan van Artevelde.
Daniel Eyerman.	Jacob Basijn.
Segher Storem.	Michiel van West.
Jan van der Vloet.	Jan de Tolneere.
Jan van den Wallekine.^5	Jacob Rynvisch.^8
Heynric Crooc.	Jan de Bever.^9

2 Zegher de Groete. S.B.

6 Heynric van der Heyen. S.B.

3 Symon Cryl. S.B.

7 Jan Hekele. S.B.

4 Claeys van Leuteghem. S.B.

5 Van den Wallekene. S.B.

8 Jacob Rivisch. S.B.

9 Jan de Liever. S.B.

[p. 27]

Item, in dit jaer waren ghebannen vj scepenen van der Kuere van vij scepenen, huere medeghesellen, uut Vlaenderen, omme dieswille dat se te Sent Truyen eenen brief beseghelden, zonder de wete van haren medeghesellen voornoemt.

Item, in't selve jaer waren te Ghent ghemaect vij hooftmannen, omme dat de stede daer te vooren qualic ghereghiert was, ende omme de stede weder te vooren te bringhene.

Item, in dit jaer was gheaccordert tusschen den coninc van Vranckrijcke en den grave Robrecht van Vlaenderen, ende Duwaey met Rysele, dese twee steden, bleven in den handen van den coninc, ende de coninc gaf zijnder dochter den jonghen Lodewijc van Nyvers, 's graven Robrechts zoone op condicie dat Lodewijc grave van Vlaenderen zijn zaude.

Item, de grave Robrecht bat zynen zoone Robrecht dat hy zaude willen renonchieren 't graefscip van Vlaenderen omme de vrienscepe van der croone van Vrankericke ende van den coninc te haudene; ende daer overe zoo gaf hy hem de herscapie van Cassele ende maecten grave van Cassele, ende die graefscipye was toegheleit Belle, Vuerne, Burburch, ende Berghene, elc met harer casselryen.

[In dit jaer gaf coninck Philips den jonghen Lodewijck van Nyvers syne dochtere, Robrechts sone, op conditie dat Lodewijck grave van Vlaenderen sijn soude; de grave gaff hem de heerlijckhede van Cassele ende maeckte hem grave van Cassele, ende daer waren annex Belle, Vuerne, Burborch ende Beerghen met de casselryen, omdat hy aen 'tgraefschap van Vlaenderen renonchieerde (G).]

Item, de coninck Fylips van Vranckericke staerf zonder hoor van hem commende.