Memorieboek der stad Ghent van 't jaar 1301 tot 1793. Deel 1

[p. 1]

Memorieboek der stad Ghent.

Dit naervolghende es Memorie int curte hoe ende in wat manieren de stede van Ghent gheghouvernert ende beleedt es gheweest nopende den wethauders ende der politie der selver stede.

Item, in den tyt van grave Baudewyn, grave van Vlaenderen ende van Heneghauwe, waeren te Ghent maer xiij scepenen, te wiens berechte stonden alle de inwoonende van der selvere poorte ende waerent tot haeren fyne, ende alsser een staerf soo cooren dander xij eenen anderen in syn stede, de welcke gheprevelegiert waeren van den voornoemden grave Baudewyn.

[p. 2]

Item, naer dat de grave Ferrant ende de graefnedinne zyn wyf ordonerden int djaer duust twee hondert ende xij dat men de voornoemde xiij, die t'haeren lyve hadden tscependom, vermaeken saude van jaer te jaere up Sente Lauwereis-dach by vier kiessers, die men nemen saude uut den vier prochien van der poort, te wetene Sente Jans, Sente Niclaus, Sente Jacops ende Sente Michiels, de welcke sweeren sauden te kiesene xiij seepenen van den notabelsten van der stede gheen scepenen dat jaer gheweest hebbende noch gheen kiessers synde; ende also men vint by naervolghenden artyklen soo cooren ende naemen de kiessers uut Sente Jans prochie vier scepenen, uut Sente Niclaus-prochie vier scepenen, uut Sente Jacops-prochie drye scepenen ende twee scepenen uut Sente Michiels-prochie, die doen ter tyt seere cleene was binnen den scependomme van Ghent, ende dese maniere van scepenen te maeckene duerde ontrent sestien jaeren.

Item, daer naer als de grave Ferrant voornoemd commen was uuter vanghenesse van den coninc van Vranckerycke daer hy xij ofte xiij jaeren in gheleghen hadde, emmers int jaer xij^c xxviij, de voorseide grave Ferrant ende vrauwe Joanne syn ghesellenede veranderden tselve prevelegie van den jaere xij, maecten ende ordonerden de xxxix in deser manieren, te wetene dat de xiij scepenen die doen waeren kiessen sauden uut haerelieder gheselscepe ofte uut den ghemeenen banck van der stede vyf goede mannen, elcanderen ten derden lede niet bestaende oft naerdere, de welcke vyve nemen sauden tot hemlieden noch xxxiiij personen van den besten ende notabelsten van der stede, maekende tsaemen xxxix, om die te deelen in drywaerf xiij, daer

[p. 3]

af dat deen dertiene dat jaer sauden syn scepenen ende dander xiij raeden ende de derde xiij wepelinghen, ende int jaer daer naer die raeden gheweest hadden sauden syn scepenen ende de wepelinghen sauden syn raeden ende de scepenen sauden syn wepelinghen, ende also by ghebuerte van jaere te jaere in eeuwicheden, ende alser iemant storve soo sauden de scepenen eenen anderen kiesen in syn plaetse.

Item, in den tyt van dese voorseide xxxix was tscependom seer ghebreet ende sy regierden seer scerpelic ende wyselic; zy daeden delven de Lieve by octroeye van der graefnedinne Margriete int jaer duust twee hondert seven en vyftich, ende sy cochtent quaertier van Overscelde int jaer xij^c liiij ende dedent apliquieren an tscependom; so deden sy ooc alle de regetten ende upstallen van Sente Baefs tot an den wech van der brugghen; sy cochten ooc Roeyghem int jaer lxix ende de Hauburch met Sente Verhilden-plaetse totter Hooftbrugghe, int jaer lxxiiij de Burchstraete ende de Mude ende meer ander plaetsen; sy deden maeken veel scoender edeficien, ghelyc Sgravenbrugghe, Tbeelfroet ende den choer van Sente Jans-kercke, de cuupen ende de Mudepoorte ende meer andere, nochtans haerlieder regement en ghenouchde elcken niet om datse eeuwich waeren ende dat andere ooc haeren toer regieren wilden.

Item, int jaer xij^c lxxv de graefnedinne Margriete ende de grave Guwy haer suene casseerden tprevelegie van den grave Ferrant, van den jaere xij^c xxviij nopende den xxxix ende by nieuwer ordenantien ordonerden dat in de wet syn sauden xxx persoenen ende niet meer, te wetene xiij scepenen ende xiij raeden, metgaeders vier tresoriers, die men vernieuwen saude van jaere te jaere up Sente Jans-avont uut-

[p. 4]

gaende ougst, by sulcker manieren dat de xxx omme toecommende jaer alle poorters van der stede elcanderen niet bestaende ten derde ofte naerdere, ende die dertich alsoo ghecooren synde sauden looten met bollekens wie de xiij scepenen syn sauden van dien jaere, ende de scepenen also gheloodt synde sauden kiesen uut den anderen xvij, xiij raeden ende vier tresoriers.

Item, nemaer van deser nieuwer ordenantien appellerden de xxxix int paerlement van den coninc Phelips de Scoene ende procederden daer soo verre by arreste dat de selve ordenancie van der graefnedinne Margriete wederroupen ende gheaboliert was, ende dat de xxxix weder ghestelt waeren in haeren staet ende tprevelegie als te vooren ende daer af brieven ghelyc van den prevelegie ludende was van den jaere lxxviij; nochtans naer de doot van der selver graefnedinne Margriete de grave Guwy haer suene persequeerde seere de selve xxxix ende verdreefse som uuter stede ende stelde nieuwe in haerlieder plaetse.

Item, langhe daer naer int jaer xiij^c een de coninc Phelips, in vanghenesse hebbende den voornoemden grave Guwy, quam te Ghent ende dede hem daer ontfaen als overheere, ende dat ghedaen synde sochte diverssche middelen om de ghescillen te veracorderene die langhe ende veel jaeren gheweest hadden tusschen den xxxix die verdreven gheweest hadden ende de xxxix die toen regierden, ende endelic hy brochte beede de partyen an beede syden soo verre als sy lieden hem summitterden van al haerlieder questien ende ooc van der scaede van der stede in syn segghenscip ende ordonantie omme danof ghedaen te syne syne gheliefte.

Item, corts daer naer de coninc ordonerde ende verclaerde

[p. 5]

dat de wet van Ghent van dien voort an vermaect syn saude in deser manieren, te wetene dat de prinche ofte syn commissarissen kiesen sauden up onser Vrauwen-avont alfougst vier kiesers, ende de goede mannen van der stede, ooc viere kiesers, alle poorters van der stede, de welcke acht kiesers sauden by hueren eede kiesen xxvj persoenen wetwerdeghe mannen van der stede naer huerlieder beste vermooghen ende die overgheven den commissarissen, ghedeelt in tween xiij, deen xiij scepenen ende dander xiij raeden, ende by deser ordenantien waert de wet vermaect ende vernieut van jaere te jaere, ghelyc hier naer verclaert wort.