Liedekens ende Refereynen Ghemaeckt by Haerlem Soetendal, van zijn Avontueren

[p. 63]

Haerlem Soetendals scheytliet,

Op de wijse: Ick ben een arme Pelgrim siet.

HOe wonderlyck ist Rat van avontuer
Dat men menighen keer siet drayen
Den eenen druck, lyden, en zwaer ghetreur
Den anderen vreucht verfrayen.

Als vrienden zijn by malkander vergaert

tGhelijckt dat zy eens moeten scheyden,
Ia mannen en vrouwen by een gepaert
Moeten haer tijdt verbeyden.

Also ist nu oock ghevaren met my

Ick meen Haerlem nu te verlaten
En te gaen trecken den Bootsghesel by
tamsterdam by der straten.

Mijn Huysvrou waer geern te portugael

maer ick soecke sulcks te beletten
Of my tamsterdam mocht helpen de Tael,
Daerom ga ickt versetten.

De neeringhe is hier so qualijck ghesteldt,

Ia geheel sieckelyck van herten
En siet sulck een reyse die cost veel Gheldt
Twelc my langhe sou smerten

Dus segh ic adieu mijn Borgers vroom,

Die Haerlem Soetendal bewaren
Of ic corts quam wederom,
God laet ons bly vergaren.

Ic danc u tsamen van goet gheselschap

princen en princessen ydoone,
Hoort ghy van my eenich achterclap,
Vaecht doch mijn baentjen schoone.