Liedekens ende Refereynen Ghemaeckt by Haerlem Soetendal, van zijn Avontueren

(1618)– Haerlem Soetendal– rechtenstatus



[pagina 59]
Een Nieu Liedeken,
Op de wijse: O Edel Rethorica peure. VErwect nu al gy jonge sinnen, opent u oogen met verstant Ghy die Retorica beminnen Grijpt d'Edel maecht nu by der Handt, met schant en laet u niet bekleeden Siet snel toe als Arents ghesicht, Wiltse in de duysternisse niet leden, Houtse doch onder 'sHemels licht Laet u herte zijn ontloken, Tot dees edel blom excelent, Sy staet so lustelyck vol roken Onder 'sHemels dou eloquent, Present, vermaen ick alle Gheesten Haer ter eeren wie het schilt, Schoeyt doch Retorijckaers leesten Gelijck als den hont snaect na 'twilt. Al is dees maecht seer mispresen Door Soylus nydigheyts ghebroet En door Invidia verknesen, Grimmende als een Sim onvroet soet, gelyt de Honich grate, is haer smake suyver klaer, Als den Appel van Granate, Die zy geeft door haer woort eerbaer. Hoort gy Retorica ontluycken, speelsche wijse of Refereyn Wiltse (bid ick u) niet misbruycken Houtse doch in weerden niet kleyn, Certeyn, het is lustich om hooren al daermense gebruyct int goe, wilt u neerstich der waert sporen Als een hert dat hoort snellijc toe. Princelic princesse lief verheven, met een oorlof neemt dit in danc lof, prys moet u zijn toe geschreven Gy Edel Retorijcsche ranc, tgeclanc, van dien wilt doch verwecken, Ghelijc de Schild-pad' haer gaet bedecken Deur dat zy so lyfelijc voelt.