Liedekens ende Refereynen Ghemaeckt by Haerlem Soetendal, van zijn Avontueren

Een nieuw liedeken,

Op de wyse: O Schepper fier.

HOe lustich ist
daer de Vrienden vergaren,
By malcander paren
Sonder eenich ghekijf, Laet allen twist,
Doch van u herte varen
Want seer veel beswaren,
Komter na sulc bedrijf,
Hout gheen nijt int hert verbolghen
Groot verdriet kan daer na volgen
Kiest vreucht voor verdriet
Alst in den Heer geschiet.

Wilt metter spoet

In Liefden zijn gheresen
Vriendekens ghepresen,
uyt broederlycke zeed'
Eerbiedingh moet
Oock onderhouden wesen
Zo wy mogen lesen

[p. 44]

 

In die Schrifteure meed'

 

Romeynen 12 moochdyt vinden,

 

Thiende veers salt u ontbinden,

 

kiest vreucht voor verdriet, alst etc

 

Ghy moet met vlijt:

 

Vwen Naesten beminnen

 

Van gantsch hert en sinnen,

 

Als u eygen Lichaem

 

Dat ghy subijt

 

Troost in u hert van binnen

 

Van den Heer meucht winnen,

 

Want 'tis hem aenghenaem

 

Paulus seght tot allen tijden,

 

Met den blyden wilt verblijden,

 

Kiest vreucht voor verdriet, etc.

 

Zijt ghy verheucht,

 

Hout u doch daer in zedich

 

Als Christenen redich,

 

Voldoet des Heeren Wet

 

In alle deucht,

 

Weest uwen tijt bestedich,

 

Met malkander vredich,

 

So wort ghy niet besmet

 

Ionghers die in wulpsheyt leven

 

wilt een goet Exempel gheven,

 

Kiest vreucht voor verdriet, etc.

 

Wilt het vermaen

 

Van u Ouderen schoone

 

Ghy Ionghers ydoone,

 

Int hert bewaren wel

 

Ghy sult ontfaen

[p. 45]

 

Van Godt tot uwen loone

 

Hier na d'eeuwige Croone

 

Want het is zijn bevel,

 

Dus wilt u tijt 'tzamen in vreden

 

Met goe wercken wel besteken,

 

Kiest vreucht voor verdriet

 

Alst in den Heer gheschiet.

 

Neemt den tijt waer,

 

O mijn Broeders verheven,

 

Wilt Christum aenkleven,

 

En voldoen zijn ghebodt

 

Int openbaer,

 

Soo sal hy u oock gheven

 

Het eeuwighe leven

 

Voor een ervelijck Lot.

 

Wilt vrymoedelijck 'tallen daghen

 

Vredelijck u Cruyce draghen

 

Kiest vreucht voor verdriet, Alst inden etc.

 

Edel Princier,

 

Ghy die 'tverdriet ellendich

 

Keeren kont amendich

 

In vreuchden 'tallen ty

 

Geeft goedertier

 

Dat yeghelijck behendich,

 

Geestelijck kiest d'inwendich,

 

Oprechte melody

 

Op datmen siet ten tooghe groeyen

 

Vruchtbaer botten hooghe bloeyen,

 

Kiest vreucht voor verdriet,

 

Alst in den Heer gheschiet.

Botten bloeyen hooghe.