De Psalmen Dauids

Den cxxxv. Psalm.

Is een dancsegghinghe door alle weldaden Gods, om dat hy zijn volc wt Egipten, ende vande Heydenen verlost

[p. 356]

heeft, ende daeromme so soude een yeghelijc tot Godt zijnen toevlucht hebben, ende alle afgoderije mijden.

Haleluia.

1

LOeft all' des Heeren naem,
Loeft doch ghy knechten den Heere.
Ghy die daer staet, hem tot Eere,
In s'Heeren huys bequaem,
In onses Godts voor-houen.
Loeft Godt, want hy is vriendelijck:
Lof-singht hem, hy is Liefelijck,
Sijnen Name wilt louen.

2

Want hy heeft Iacob vroet
Hem vercoren wt ghenaden:
Israel oock door weldaden

Tot zijn eyghendom goet.

Want ick weet voor warachtich,
Als-dat de Heere zeer groot is,

[p. 357]

 

Dat hy te bouen gaet ghewis

 

Alle Goden onmachtich.

3

All' wat hy wilt doet hy,
In Hemel, Aerd', in d'Zee mede,
In diepten, in elcke stede.

Die de Wolcken laet vry

Op-gaen wt s'werelts eynden:
Den Blixem met Reghen brengt voort:
Die wint wt een heymelijck Oort
Ouer alle can seynden.

4

Die d'Eerst' gheboorten snel
In Egypten brocht ten valle,
Der menschen end' des Vees alle.

Sijn Teekenen hy fel

End' wonderen aenrechten,
O Egypten Lant, ouer ou,
Ouer Pharao straf end' bou,
End' ouer all' zijn knechten.

5

Die veel Volcken sloech doot,
Ende veel Coninghen machtich.
Oock Sihon den Connic prachtich

Der Amoriten Hoot,

Hy brocht om van ghelijken
Oock Og den Coninck te Basan,
Daer-en-bouen in Canaan
Alle de Coninc-rijken.

6

End' Godt heeft onbesuert
All' hun Landt zijn volck ghegheuen.
Heer', uwen naem blijft verheuen,

In eewicheyt hy duert,

Ins-ghelijcx duert ghestadich

[p. 358]

 

Voort end' voort v ghedacht'nis al.

 

Want de Heer' zijn Volc richten sal,

 

End' zijn knechts zijn genadich.

7

Enckel Siluer end' Gout
Sijn der Heydenen Afgoden,
(Sijnde van Godt hardt verboden)

Door s'Menschen hant ghebout.

Sy hebben alle Monden,
Hunder gheen' en spreect nochtans yet:
Met hun Ooghen en sien sy niet,
Sy worden blint beuonden.

8

Sy hebben (dit verstaet)
Ooren, die gheen ghehoor gheuen:
Noch gheenen Adem daer-neuen

Wt hunnen mondt en gaet.

De gheen' die sulcke maken,
Die zijn ooc inden seluen staet:
Oock staen die in ghelijken graet,
Die hun Hoep' daer op staken.

9

T'Huys Isr'els loef' den Heer':
Wilt den Heere daer-en-bouen
Ghy van t'Huys Aarons louen.

Prijst ghy hem euen zeer

Van t'Huys Leui aendachtich:
Loeft hem ghy die den Heere vreest.
Gheloeft sy Godt wt Sion meest,
Die aldaer is woonachtich. Haleluia.