Archives ou correspondance inédite de la maison d'Orange-Nassau (première série). Tome V 1574-1577

[p. 542]

† Lettre DCLXIX.
⁺Le Prince d'Orange à M^r de St. Aldegonde. Il regrette qu'on se laisse abuser par Don Juan.

Monsieur de St. Aldegonde. Depuis que j'ay dépesché le Sieur de Catz vers Bruxelles, par lequel je vous escripvis bien amplement de tout ce qui me sambloyt convenir au bien et advanchement des affaires communes, j'ai receu quelques lettres, tant du Sieur Théron que d'aucuns aultres, et, par icelles et les pièches y joinctes, ay veu les occurrences de par delà, et en quelz termes soit la négociation des Estatz avecq Don Jéhan d'Austriche; laquelle, à la vérité, je treuve plus avancée que pour le bien de la patrie il ne convient; ne scaichant imaigener dont procède que ces S^rs de par delà se laissent aller si avant aux vaines persuasions et langaige abusiff du dit Don Jéhan, sans aultrement peser l'importance du faict, et comme il leur est impossible de reculer sans se précipiter en extrême ruyne; de tant plus qu'en tout son mis en avant l'on ne pourroit asseoir aucun fondement de redresse d'affaires ou de meilleur tractement qu'à esté celluy du Duc d'Alve mesmes. Cependant, pour de mon costel satisfaire à mon debvoir et ne délaisser chose qui puisse servir à leur conservation, j'ay advisé d'escripre encoire une lettre⁽¹⁾ aux Estatz-Généraulx par dessus les deux aultres que, comme sçavez, je leur ay desjà escript, afin

+ 1576. Novembre.

(1) Lettre. Celle du 31 nov. qui commence ainsi: ‘Gy sult alrede by twee schriften gesien hebben hetgeent my bedunkt belangende hetgeent men sal moeten handelen met Don Jan:’ Bor, 747.b

[p. 543]

⁺que cy-après ilz n'ayent à s'excuser de n'avoir esté préadvisez de ce qui leur en debvoit advenir. Je vous envoye ce présent porteur exprés, qui entre aultres est accoustumé d'escripre au comptoir de mes sécretaires, avecq la Lettre ouverte, afin que vous la puissiez voir et visiter, et, y trouvant quelque chose à changer, adjouster ou diminuer, que le faictes, le faisant puis après rescripre par le mesme porteur, afin qu'il n'y ait soubçon que la lettre soit esté escripte à Bruxelles, ayant à cet effect donné au porteur encoir cincq blans signetz pour les employer tant pour ceste lettres, s'il est besoin, comme aussy pour aultres lettres aux S^rs que, par l'advis de M. l'Ambassadeur⁽¹⁾, Lisfelt et Théron trouverez convenir. Le 29 jour de novembre 1576.

A Monsieur de S^t Aldegonde.

+ 1576. Novembre.

(1) Ambassadeur. Mondoucet.