Tösse vroeg- en naojaor

[p. 8]

[p. 9]

Biej eine graafsjtein

Zo hat ter 't biej zien laeve nog besjreve:
bring, es mien vrunj kaddiesj höbbe gezag,
mien liek nao Beth-ha-chajiem, wo 't
vlak biej de ingangspórt weurd neergelag.

Zo gebeurde; ich höb 't graaf gezeen;
de naam is door de raegen oetgesjlete,
de sjtein half weggezak, 't voelgreun mós
zeuk ziene waeg veurzichtig door de sjplete.

Mer God zij dank; dem kint nieks meer gebeure,
en es de ingele op de wölk gaon sjtaon
en zich op häör trómpete laote heure
is hae den eerste dae op waeg kint gaon,
want 't leste oordeil is veur hem
gilgoel-ha-métiem: trök nao Jerusalem.