Declaratie van dese nauolghende Epistele.
AContius gereyst sijnde naer Delos, om Diana daer Sacrificie te doene, so de maniere was vanden lande: eñ want Diana daer gheeert wort, soo heeft hy daer gesien eẽ schoon ionge maecht inden tempel die oock daer gecomen was, waer op hy met liefden ontsteken was: maer want sy edelder was van gheslachte dan hy, soo en dorste hy haer dat niet te kennen geuen, maer hi practiseerde een bedroch, om de simpel maecht te verscalckene, so werp hi eenen appel voer haer voeten, daer op geschreuen stonden dese veerskens.
Ick Cydippe sweere by Diana de goddinne,
V Acontio geefick mijn trouwe met hert en sinne.
Dit lesende Cydippe wert verueert, altijt groot achterdencken hebbende op die woorden meynende dat sy daerom haer trouwe hem gegeuen hadde, dies sy cranck werdt ende seer sieck van ongenuchten. Haer vader hadde haer eenen anderen man toegheseyt, maer sy en dorst dien niet trouwen, dies Acontius haer schrijft desen brief, geuende haer te verstane, dat haer Diana quellende is met siecten, om dat sy niet en volbringt dat sy geloeft heeft.