Declaratie van dese nauolgende Epistele.
OP een tijt in der nacht als Hecuba Priamus huysvrouwe coninginne van Troyen beswaert was, so quam haer in hueren visioene te voren dat sy een groote vlamme sach, duer de welcke Troyen verbrande. Priamus dit van haer verstaende, heeft hem gaen beuragen by zijn gheleerde die in sijn rijck waren, wat dat desen droom bedien moch te. De welcke hem bediedẽ merkelijck, dat duer die vrucht die Hecuba droech, Troyen noch in brande comen soude: dies Priamus alsoo haest als tkint gheboren was, beual datmen het kint soude dooden. Hecuba dit vernemende, haer moederlijck herte hadde deernisse met haer vruchte, ende heuet in een ghehuchte laten op voeden heymelijck dat Priamus niet en wiste, ende doẽ het kint volwassen was, dwelck Paris hiet, wert een fray ionghelinck, so dat Oenone in hẽ groot behaghen hadde, ende wert onsteken met zijnder liefden. Maer daer na, Paris (want Venus hẽ toe gheseyt hadde Helenam) is naer Griecken gereyst Oenone niet te kennen gheuende waerom me, ende als hy wederom na Troyen quam soo en woude hy Oenone niet meer kinnẽ, dies Oe|none mistroostich zijnde schreef hẽ desen brief.