Declaratie van dese nauolgende Epistele.
THeseus de sone van AEgeus, doẽ hi den Minotaurum gedoodt hadde duer hulpe van Ariadne Minos dochter, dies Theseus haer vastelijc gheloefde te trouwen, ende heeft haer met hem gheleyt en haer suster Phedra oock. Maer daerna heeft hy Ariadne op een eylant laten sitten, ende is heymelijc gaen strijcken met Phedra haer sustere de welcke hy troude. De welcke Phedra de wijle dat Theseus wt den lande was, verliefde op Hypoliten, die Theseus haer mans bastaert sone was, daer moeder af was die coninginne van Amasonien, welcke Hypolitus was eẽ schoon ionck man, maer hy en was niet genegen tot eenige vrouwen oft tot wellustẽ, dan alleene hy in weycheyt genuchte hadde eñ in tvelt te sijne. Dies Phedra siende dat hy altijt int velt was en hem selden spreken mochte, so screef sy hem desen brief, om hem tot haer liefde te treckene, niet aensiende dat sy was de huysvrouwe van sijnen vadere. Hier wt machmen mercken dat de rasende liefde eere noch schande en aensiet.