Declaratie van dese Epistele.
ALs de Grieckẽ na Troyen ghetrocken waren, die steden die rontomme Troyen laghen sij aldereerst destrueerden: so hadde Achilles twee oft drij steden in genomen ende hy quam in de stadt vã Lymersse, ende daer nam hy twee ionghe dochters van der stadt, deene hiet Crysis, dander hiet Briseis ende Briseis: hielt hy voor hẽ seluen, eñ dander gaf hy Agamemnon, de welcke Agamemnon moeste wederom restitueren, dies hy Achilles Briseis ontwelchde, waerom Achilles so verstoort was, dat hy hem der orloghen niet meer moeyen en woude, noch duer bidden oft smeecken en was hy gheensins om te settene: noch hy en woude Briseis niet wederõ hebben al wertse hem weder ghepresenteert. Ia en Agamemnon begheerde hem noch oock giften daer en bouen te scenckene. Hier om schrijft Briseis hem desen brief sijnde noch by Agamemnon, ende hadde lieuer by Achilles gheweest, beclagende, haer van sijn groote gramschappe.