Het triumph-hofjen Iesu Christi ende Marie
(1633)–Pieter van Gelre–
Auteursrechtvrij
[pagina 47]
| |
Op de wijse: Het viel een Hemels douw, &c.
WIe is dese die hier komt aene
Ghelijck den dagheraet,
En schoon gelijcken als de mane,
Klaer als des Sons cieraet,
| |
[pagina 48]
| |
Geschickt gelijck als een slach-oorden
Der heyr-cracht wel geset,
't Is sy die het Serpent vermoorden:
Want s'heeft sijn hooft verplet.
2.
O wonder Maecht Maria pure,
Ghy tweeden Eva soet,
Die ons brengt vreucht op dese ure,
En dat door u ootmoet:
Ghy zijt het licht van Godt den Heere,
Dat lichten soud' voortaen,
Daer hy met lof, glory en eere,
Is selver uytgegaen.
3.
Ghy zijt dien ware Raechel schoone,
Die Iesus ons hier mee'
Ginckt trecken uyt des Hemels troone,
Als Raechel, Iacob dee':
Want hy is selven neer gekomen
En heeft ons mensch' natuur,
In uwen lichaem aengenomen,
en ghy bleeft even puur.
4.
Ghy zijt dien kandelaer van Goude,
Met seven lichten klaer,
En d'Arcke die oprecht doet houden
De tien gheboo'n in haer,
Het Manna daer wy Is'relliten,
Als Pelgrums leven af,
Oock Moyse roed', die wech doet smijten
Ons Vaders eerste straf.
| |
[pagina 49]
| |
5.
Ghy zijt dien Raechel weer voorware
Die Ioseph hebt ghebaert,
Niet dien die hier in dit besware
Had macht seer hoogh vermaert,
Over sijn Broeders groot gheslachte,
En al 't Egypten landt,
Maer hem dien Ioseph der Heyr-crachte
Godts Sone triumphant.
6.
Lof zy u Stoel van Salomone
Maria suyver Greyn,
Ia oock sijn excelente Troone,
O Poorte daer alleyn
Godts eygen Soon is door ghetreden,
Sonder besmet te zijn,
Bidt voor ons die hier noch beneden,
Droef wand'len met veel pijn.
FINIS. |
|
