|
| |
| |
| |
Inhout van het X V. Capittel.
Ghi die sterc zijt, helpt den swacken haer swacheit dragen,
Wilt eendrachtich den Heer met mont en herte prijsen:
Sijt vierich int ghebet, helpt den droeuighen claghen,
Schept een behaghen, in v broeder t'onderwijsen.
| |
Den twintichsten stichtsanck, op de wijse van den 27. Psalm: God is mijn licht, &c.
1 WY die sterck zijn, zijn schuldich hier te dragen,
Der swacker crancheyt met lijtsaem gemoet,
Ons seluer toe te geuen t'geenen dagen,
Maer onsen naesten tot stichting' en goet,
Want Jesus Christus onse Heere soet,
Hem seluen hier niet toe en geeft voor waer,
Maer so van hem geschreuen is hy doet,
En des versmaders smaet leyt op hem swaer.
4 VVant al wat ons te voren is gheschreuen,
Is tot onser leer en stichtingh' gheschiet,
| |
| |
Op dat wy door des lijtsaemheyts aencleuen,
En des schrifts troost, hoop souden hebben siet.
5 De God des lijtsaemheyts daer troost van vliet,
Gheeft dat ghy onder een tot alder tijt,
Eensins gheuoelt [in tgheen dat hy ghebiet]
In Christo onsen Heer ghebenedijt.
6 Op dat ghy Gode, ende oock den vader
Ons Heeren Christi prijst wt eenen mont.
7 Daerom neemt d'een d'ander aen alle gader,
So Christus ons aen nam die ons by stont,
Tot Godes heerlijckheyt [en wert goet ront]
8 Een dienaer der besnijdinghe met last,
Op dat hy de beloften, en tverbont
Der Vaderen hier soude maken vast.
9 Op dat de Heydenen aen alle zijden,
God souden prijsen wt ghenade hier:
Daer staet, hierom so sal ick v belijden
Onder den Heydenen met sanghe' fier.
10 Sijt Heydenen nv vrolijck van manier,
Met zijnen volcke hem nv eer bewijst,
Den Heere die daer is seer goedertier
11 Looft nv alle, en zijnen name prijst.
12 Daer sal een wortel wt Jesse hier wesen,
Ende die daer wt is, in hem verheucht:
Heydenen werden gheregeert door desen,
In hem hopen sy, door zijn groote deucht.
13 De God der hope veruull' v met vreucht,
En vrede int ghelooue met eendracht,
Op dat ghy oueruloedich hier zijn meucht
In het gheloof door tsheylighen Gheests cracht.
| |
Den eenentwintichsten stichtsanck wt den selfden Capit. op de wijse vanden 44. Psalm: Heer v wonder wercken, &c.
| |
| |
14 BRoeders ic ben seker door vroetheyt,
Dat ghy nv ooc vol zijt van goetheyt,
Met alderley kennis veruult,
En machtich oock nv wesen sult,
D'een d'ander hier te doen vermaen,
15 En dat ic dus stout heb geschreuen,
Heeft Gods genade meest gedaen,
Die my van hem hier is gegeuen.
16 Ick ben des Heeren Christi dienaer,
Voor v ghy Heydenen openbaer,
Om te prediken Godes woort,
En te bedienen alst behoort:
Op dat v offerhande meest
God aenghenaem sy [int volbringhen]
Ende gheheylicht door Gods gheest,
17 Ick roem in Christo in dees dinghen.
18 VVant ick en sou niet derren spreken
Van eenich dinck van my ghebleken,
Door Christum die twerck heeft ghewrocht
Aen Heydensche van my besocht,
Also met woorden ende twerck,
19 Teeckenen ende wonderheden
Door de cracht van Gods gheest seer sterck,
| |
| |
Int Euangeliums verbreden.
20 Ick ben gheweest also eergierich,
Om twoort te prediken seer vierich,
Niet daer Christus wel was bekent,
21 Op dat ick op het fondament
Eens anders en timmerde niet:
Ende die schrift bleeck als wy lesen,
Diet onuercondicht is die siet,
Diet niet en hoorde weet van desen.
30 Ick bid v broeders door den Heere,
En door de liefde des gheests seere,
Strijt tot God met tghebet voor my,
31 Op dat ick in Juda werd' vry,
En mijnen dienst sy aenghenaem
T'Jerusalem en in veel steden,
32 Tot dat ick weder keer bequaem,
33 So sy met v de God des vreden.
|
|
Auteursrechtvrij