Den Sendtbrief Pauli tot den Romeynen
(1582)–Johan Fruytiers–
Auteursrechtvrijop stichtsanghen gheset
[Folio C3r]
| |
 hebben, maer niet met recht verstant.
3 Dewijl sy Gods rechtuaerdicheyt niet kenden,
En haer tot eyghen rechtuaerdicheyt wenden,
So en zijn sy Godes rechtuaerdicheyt
Niet onderworpen, maer sy zijn misleyt.
4 Teynde der wet, is Christus onse Heere,
Rechtueerdich voor hen die gheloofden seere.
5 Moyses beschreef rechtuaerdicheyt der wet,
En seyt, de mensch leeft hout hy haer gheset.
6 Maer de rechtuaerdicheyt wt den ghelooue
Die spreect aldus, en zijt hier in niet dooue:
Segt niet int hert, wie climt hier wt het graf
Ten Hemel: dat is Christum brenghen af.
7 Oft oock wie sal inden afgront door dringen,
Dat is Christum vanden dooden op bringhen:
Oft wie sal inden afgront varen neer,
Dats Christum vander doot op bringhen weer.
8 VVat seyt de schrift [vanden nieuwen verbonde]
Het woort dat is na by in uwen monde,
En in v herte isset oock na by,
Dits twoort des gheloofs, en dit preken wy.
9 Ist dat ghy Christum mondich cont belijden,
En met v hert ghelooft tot allen tijden
Dat God hem vander doot heeft op ghewect,
Ghy wort behouden [dit voldoeningh' strect.]
10 Therte ghelooft tot rechtuaerdicheyt pure,
Den mont belijt salicheyt telcker ure,
11 Want de schrift seyt van Christo alst betaemt,
So wie in hem ghelooft, blijft niet beschaemt.
12 Daer is geen onderscheyt tusschen den Joden
| |
[Folio C3v]
| |
Oft Griecken: want hy die haer gaf gheboden,
Ons alder Heer is, rijcke ouer al
13 Want die hem aenroept hy behouden sal.
14 Hoe sullense hem dan aenroepen moghen,
Daer sy niet en gheloofden [onbedroghen]
Gheloouen oock sonder te hooren: want
Hoe salmen hooren sonder predicant?
15 Hoe sullen sy prediken onghesonden,
Ghelijck daer is Esayas vermonden:
Hoe lieflijck zijn de voeten en tghemoet
Der gheenre die daer preken vreed' en goet.
16 Niet al waren sy twoort Gods gehoorsame,
Want hy seyt, wie gheloofde dat bequame:
17 So coemt het ghelooue als wert ghehoort,
Ende het ghehoor door des Heeren woort.
18 Hebben sy nv niet ghehoort met verstande,
Voorwaer tgheluyt dat ginck in elcken lande:
Ende haer woorden die zijn oock bekent
[Seer opentlijck] tot aen des werelts ent.
19 Bent Israel God niet door dit ontdecken,
Moyses seyde, ick sal v gaen verwecken
Tot navolgingh' door hen die niet en zijn,
Door dit volck gheschiet v toorne en pijn.
20 Esayas woorden oock dit voort brochten,
Sy vonden my die my hier niet en sochten:
Ick ben gheworden hen lien openbaer,
Die hier na my niet en vraechden voorwaer.
21 Tot Israel seyt hy [haer lien ter schanden]
Den heelen dach strecte ick wt mijn handen
Tot het volck twelck daer onghehoorsaem blijft,
En my teghen spreect, ende quaet bedrijft.
|
|
