Tpalays der gheleerder ingienen, oft der constiger geesten

[fol. Aviijv]

x.

Daer en bouen spreect de selue seer excellent
Dat hem een elck present // tot elcken termijne
Behoort te wachtene voor daccident
Ouer tghewichte te gane diuijne
Volghende die warachtighe greyns ten sijne
Ghelijc de Romeynen voortijts vroom int regieren
Waren gheluckich so langhe si de doctrijne
Volchden der waerheyt, reyn int verchieren.
Maer als si giericheyt begonsten te obedieren.
Ende dongherechticheyt werden onderdaen.
So sijn gheschuert der victorien banieren
Ende duer haer eyghen handen sijn si vergaen.