Haerlems belegerings treur-blij-eynde-spel

⁺XI. Vertooningh: Is vvederom een Ghespreck tusschen beyden, bestaende in thien vande treffelijcste persoonen.

+ 3. Dito.

Verklaringh.

De derde 'tsamen-spraeck vergheefs ghehouden wordt,
Elck houd sich vast by 'tsijn, daer't yeder meest aen schort.
Het Krijghs-volck is ghesint (ghewapent) uyt te trecken;
Hier toe den Spangiaert sich gheensins en laet verwecken.

[fol. D iijv]

Ripperda. Steenbach. Bordet.

Wat isser nu verricht? den vyant is ghemoed,
En d'arme Borghery daer teghen qantsch ontmoed.
Den vyand is vertrost, sy kennen ons ghemoeden,
En weten, waer voor sy haer efter sullen hoeden.
Elaes, te spade klaeght den voghel, die in't net
Sich selven willens ende wetens heeft gheset.
'tVolck raest en wederroept, niet wetend' wat beginnen,
De Knechten sijn ontstelt en hersseloos van sinnen,
Elck wil ter poorten uyt, en woelt met groot onrust,
Den moed is wegh, daer is om vechten gheenen lust:
Het Vrouw-volck weent en huylt, elck raest my om de ooren,
Soo dat ick wars, ja kies ben van dit langh te hooren.
Komt vechten wy ons dood, of breken 'tsamen door,
Ick met mijn Schild-knaep wil u allen treden voor.
Die sterft, sterft voor het Land, ter eeren van Orangien,
Die over-blijft, die leeft ten trots van't moordigh Spangien.
Wat seght ghy, Mons Bordet, spreeckt, sijt ghy soo ghemoed?

Bordet.

'kVind alles oorbaer, wat mijn Heere raed en doet.
Is dit den hooghsten raed? 'tgheschie dan, laet't soo wesen.

Steenba.

Wat brenght den Krijgher goeds? hoe dus verhaest in't wesen?

1. Sold.

Een Duyf ghekomen is, en heeft een brief ghebracht
⁺Waer in beschreven staet 'tgheschiedde deser nacht.

Rippard.

Komt Steenbach, laet ons eerst doorsnoffelen dit schrijven,
En onsen raedslagh soo langh ruggh'lingh laten drijven.
Misschien den brief yet goeds na onsen wille buyght.

Bordet.

'tKan wesen; doch mijn hert het teghendeel betuyght.

+ 4. Iulij.