Exordium magnum

van enen brueder den onse suete vrouwe kruut gaf

ITem toe clarendael was een monic al was hie een mensche van gueden wille nochtans was hie van lichaem lecker ende cranck ende daer om was hie oueruloedelike sorchuoldich in die spise wt te verscheiden ende in verweruinge der medecinen. Meer die guedertierne here die barmhertelike pleghet te verbeteren die dwelende menschen. Wolde desen monic weder leiden totten wech der waerheit. ende dat hie weten solde ende verstaen hoe salichliken hie ons vermaent dat wy al onse sorchuoldicheit sullen werpen in hem. want hie sorghe heuet van ons. In dusdanigher maniere heuet die here hem ghewerdiget te vanden den ghenen die simpelike sundichde. Die selue brueder sach in enen visione des nachtes. ende sie alle die brueders haesteden ter kerken alse te begaen die loeue des godliken dienstes. Ander doeren der kerken stont die oetmoedige hoeghe moeder der barmherticheit die goddienstige ionfer maria draghende

[p. 18]

recht alse ene busse mit kosteliken krude. ende gaf daer wt werdelike mit haerre alre suetster hant enen yegheliken brueder die in dat bedehuus ghinc enen lepel vol van den krude. ende spisde die ghene die dat nemen myt wonderliker sueticheit. Doe dit dese brueder sach verblide hie hem seer ende dachte in hem seluen dat hie oec deelachtich solde werden sonder wederstoet dier hemelscher spisen. Doe hie toeginc toe die hant der alre goddienstichster verweruester. die alre guedertierenste ende waerachtelike sachtmoedighe ionfer wesen af segghende hebstu behoef mynre medicinen. bistu niet een wys meister van medicinen. ende dragheste sorchuoldelike dins selues sorghe. Ganc ganc ende ghebruke din medicine alstu wilste. Want ic draghe sorge voer die ghene die hoer sorghe werpen op den heren ende mynen soene. Doe dat die broeder hoerde schaemde hie hem ende verghifnisse biddende loeuede he hoer dat hie voert an hem niet onderwinden en solde van hem seluen. mer dat hie al die sorghe sins leuens gode ende oer beuelen solde. Die ghemene toeulucht alre kerstenen menschen. ende die sunderlinge beschermster hoerre sunderlinger knechten der broederen van cistercien ontfenck dat voldoen mit der lofnisse. ende gaf guedertierlike ghenade den monic dient berouwede dat hie misdaen hadde. ende deelde hem mede die salige spise. Doe dese brueder ghesmaket hadde die benedixcie der hemelscher medicinen te hantes waert hie ghesont van sinre tederheit ende krancheit. ende hie gaf ouer alle medicine ende alle leckere spise ende gaf hem seluen toe die ghemene spise. Ende daer om mitter hulpe der ghenaden godes heuet hie in korter tyt anghetoghen schoenheit ende starcheit mit ghesontheit des lichaemes ende der sielen te gader. Waer sin nu die brueders die meer schinen na te volgen ypocratis scholen dan xpistus schoelen. die alte seer begherlike mynnen die ghesontheit hoers sterfliken vleisches. Alden soemer becommert sin mit alre andachte te soeken ofte te vergaderen somyghe crachtige ende wilde krude ofte wortelen. ende niet min en sin se sorchuoldich inden winter die selue krude te drughen te pulueren te malen te gader te mengen. ende sie en soelen ghene cracht der medicinen hebben ende werpen hem seluen in allene die scholt des eyghenen willes die die alre anxtelicste eygenheit is. Sie leren bidde ic sie leren mit den voerghesechden exempelen mer te betruwen inden heren dan in galieno. mer te hoepen in die conynginne des hemels dan in die krude der eerden. wetende sekerlike dat in dat beuende onderuindinge des rechtuerdighen ordel godes sie gheordelt soelen werden niet van der conplexien. meer vander professien. daer sie mit alte laten berouwe sullen meer willen dat sie ghedraghen hadden sorghe haerre sielen. dan dat sie al hoer leuen lanc onnutteliken becommert hebben gheweest om te verkrigen ghesontheit hoers vleisches