hier beghynnen sommighe exempelen ghenomen wt den boeke dat ghemaket is van merkeliken mannen der orden van cistercien
Int eerste van enen brueder in welkes hande die kroemen verwandelt weren in peerlen
HEt was des cloesters regel dat wanner die broeders ter tafelen saten ende de maltijt ghedaen was dat sie sorchuoldelike vergaderden ende eten die croemen die van den brocken broedes vielen op dat sie van dese versumenysse niet schuldich gheuonden en worden voer gode. Ende het gheuiel op enen dach dat een broeder een sorchuoldich bewaerre synre consciencien was sittende ter tafelen mytten anderen broederen. doe die maeltyt ghedaen was hielt die croemen die hie naeder ghewoenten vergadert hadde besloeten in synre hant. ende myt groeter sueticheit des herten toe hoerde hie totter lexen meer eer dat hie sie at soe waert die lexe haestelike gheeyndet doe die prioer een teiken gaf. Die broeder verscrickede hoe hie tot hem seluen quam ende bekande myt groeten anxte syne scholt. Wat solde hie nochtans doen. Ten was hem niet gheoerloft wech te werpen noch te eten. an beiden syden was perikel der onghehoersamheit. Hie hielt sie besloeten in syne hant denckende dat dese scholt der versumenysse niet afghewasschen en mochte weerden dan ouermids bichte ende penitencie. Doe dan naeder gracien dat teiken des bichtes ghedaen was. toech he den prioer ouer syde ende badt verghifnysse vallende in syn aensichte apenbaerende syne versumenysse myt groeter eenuoldicheit syns herten. Die pryoer berispede syne scholt alset reden was. ende vraghede wat hie mytten croemen ghedaen hadde. hie sechde here hier syn sie in onser hant. Ende alse die pryoer gheboet dat hie sie toenen solde soe loec hie syn hant op. ende sie in synre hant syn gheuonden voer die croemen die alre kostelixste duerbaer ghesteente. Meer wat wene wy warom wolde die almechtighe god alsoe gloriosen myrakel doen. in alsoe cleinen dinghen. dan dattet allen menschen apenbaer solde wesen. hoe seer dat hem die broeders behaghen in vergaderinghen die vuerich syn van gheeste. die om synen anxten wille niet allene myt sorchuoldicheit holden die meeste gheboede meer oec die mynneste gheboede
Auteursrecht onbekend