Een bewys dat beter is eenen goeden crijgh, dan eenen gheveynsden peys
(1606)–Jacob Duym–
AuteursrechtvrijVande vijfde Gheschiedenis, de eerste uytcomst.
Goeden Crijgh, T'gheld.
Goeden Crijgh.
Arm, arm, arm, tsal hier nu gaen ghelden,
VVAer blijft doch nu miin goe vrindin,
De straten ziin droogh, groen de velden,
Arm, arm, arm, tsal hier nu gaen ghelden.
T'gheld.
Hy tiert, hy baert als den ontstelden,
VVat hebt ghy doch in uvven sin?
Goeden Crijgh.
Arm, arm, arm, tsal hier nu gaen ghelden,
VVaer bliift doch nu miin goe vrindin.
| |
[Folio F4v]
| |
T'gheld.
VVel zijt ghy heel steeck blind, siet ghy niet vvaer ick bin,
Ick ben schier los en vrij, de banden zijn ontbonden,
Daer sal gheld ghenoech zijn tis claer nu al ghevonden,
tVVord claer nu overal voor u ghemaeckt ghereet.
Goeden Crijgh.
tHert lacht in mijnen buyck als ick dit hoor en vveet,
Laet vrij nu Trommels slaen, laet de Trompetten clincken,
Den Spaingnaert die dit Land vvel meynden heel te crincken
En ontsie ick gants niet, noch oock al sijn ghevvelt,
Ick hoop met een schoon heyt, te comen haest int velt,
Te vvater, en te Land', sa lick hem vroom besoecken,
Hy plach met voorden stout te tieren en te vloecken,
Sijn hert dat heeft ons lang gheheel en al vernielt,
Maer Spaingnen, Spaingnen tvvaer tijd dat ghy eens op hielt,
Ghy hebbet Land gherooft, ghebrand, met uvve benden,
Den Adel gants verjaecht, de vrouvven oock doen schenden,
Sy hebbent lang ghenoech gheleden met ghedult,
Den tijd comt nu dat ghy betalen sult u schult,
Ghy vvord bevochten haest in veelderley manieren.
T'gheld.
Om my salmen u noch in u selfs Land schoffieren,
Den goeden Crijgh sal hem haest maken op de reys.
Goeden Crijgh.
Den goeden Crijgh is doch veel beter dan den peys,
Die sy voorvvenden nu en meynen ons bedrieghen,
Mocht gaen naer mijnen sin ick vvilder niet om lieghen,
Ick en vvou haer niet eens meer hooren niet een vvoort.
T'gheld.
Neen die keers is al uyt, den Crijgh die moet nu voort,
Hy moeter nu haest aen met houvven en met kerven.
| |
[Folio G1r]
| |
Goeden Crijgh.
Tis beter cloeck en vroom voor tVaderland te sterven,
Dan by den Spaingnaert te zijn een slaef t'aller tijd,
VVy vechten om van sulcx te zijn gheheel bevrijd,
Daer voor vvil ick altijd mijn goed en bloed vergieten,
Die int lest overblijft sal vrijheyt claer ghenieten,
Des vvapent u elck een met herten onvertzaecht.
T'gheld.
Ghy Edel, borgher oock, ja al vvat vvapen draecht,
Elck doe doch nu zijn best, denct vvat ons sou ghebeuren,
Ia het Kind in de VViech, soud naermaels noch betreuren,
VVeest nu het Land ghetrou, elck doe het Land doch dinst.
Goeden Crijgh.
Ick sal u al seer vvel aenvueren meest en minst,
Houd u maer slechts gereet, vvilt nieuvvers ooc voor duchten,
D'eendracht des Lands vermach veel, daer is niet te suchten,
Den Leeu die heeft nu claer zijn tanden scherp ghevvet.
T'gheld.
Naer Spaingnen reyster veel daer vvilter seer veel met,
Tis nu den rechten tijd, om goeden buyt te halen.
Die tzijn verloren heeft, mach hem daer vveer betalen
tSijn brieven van Marck, tis claer rechtveerdich goet.
Goeden Crijgh.
O Heeren Staten tLands ick prijs u vroom ghemoet,
Godt laet u blijven doch in dit cloeck stuck volheirdich,
Gaen vvy samen nu by onsen Prinshoochvveirdich,
Graef Mauritz die daer is ons ghestelt tot Veld-Heer,
Ick vvil hem ten dienst staen, hem sy lof prijs en eer,
Om ons tvvee vvenst hy seer, des laet ons by hem voeghen.
T'gheld.
Ick ben den rechten Ploech, om in den Crijch te ploeghen,
| |
[Folio G1v]
| |
VVant daer ick niet en ben daer blijfter veel beschaemt.
Hoe groot een Crijchsman is, hoe hooch hy is befaemt,
Als ick daer niet en ben hy moet den hoochmoet svvichten.
Goeden Crijgh.
Daer ghy niet en sijt en is doch niet uyt te richten,
VVant al is daer tvolck al, men can vrij niet ghedoen
Het gheld dat moet daer zijn, tis voor int saysoen,
En daer sulcx ghenoech is, ist tvolck vvel haest te vinden.
T'gheld.
En die geld genoech heeft, die crijcht voorvvaer vvel vrinden,
Men bringter oock van als vroech en spaed' by de vverck.
Tis tgheld dat daer maeckt moet, die gheld heeft noemt hem sterck
En hy can sijn best doen, den vyand oock verrassen.
Goeden Crijgh.
Sa, sa, vvy moeten nu gaen op den haspel passen,
VVant tis veel daer tvolck en thgeld tsamen al ghereet is,
Ga naar margenoot+En dijser moet ghesmeed sijn tervvijlen dat heet is.
|
|