Een bewys dat beter is eenen goeden crijgh, dan eenen gheveynsden peys
(1606)–Jacob Duym–
Auteursrechtvrij
[Folio B3r]
| |
Vande eerste Gheschiedenis, de eerste uytcomst.
Bloed-dorstich ghemoed, VVraeck-gierich hert.
Bloed-dorstich ghemoed.
SIngnoor Soldados, vvaer blijft ghy nu?Ga naar margenoot+
vvraeck-gierich hert.
Padro, que queris vestra merche?
Bloed-dorstich ghemoed.
VVy moghen ons vvel cleeden met rou,
Singnoor Soldados, vvaer blijft ghy nou?
vvraeck-gierich hert.
VVat magh daer schuylen, ist vveer al d'ou?
Oft ist voor ons al peys envre?
Bloed-dorstich ghemoed.
Singnoor soldados, vvaer blijft ghy nu?
vvraeck-gierich hert.
Padro, que queris vestra merche,
Oft isser erghens buyt ick vvil seer gheeren me,
Segt recht uyt vvat daer schuylt, t'verlanghen, my te lanck,, is.
Bloed-dorstich ghemoed.
Tis van een saeck daer my het hooft, en t'hert af cranck,, is,
vvy ziin verlaten schier, ons naeckt een groot ghevveen,
Mids onses Conincx dood, t'vvas onsen troost alleen,
vvy ziin bedorven doch nu vvy hem soo verliesen.
vvraeck-gierich hert.
Iae d'Inquisici sal vvel goeden raed verkiesen,
Den jonghen Coninck sal haer volghen voor en naer,
| |
[Folio B3v]
| |
Door haer ingheven vvord hy argher dan den Vaer,
Dus hebt doch goeden moet, t'sal noch int lest vvel vvesen.
Bloed-dorstich ghemoed.
Iae maer dees Landen hier, die hopen nu ghenesen
Door onses Conincx dood, daer is lang naer ghehaeckt,
En t'Land dat heefter vry haer rek'ning op ghemaeckt,
Soo daer veranderingh' comt, ons magh claer vvel grouvven.
vvraeck-gierich hert.
Albert van Oostenrijck salt vveren vvel te vrouvven,
l'Enfant' en hy ziin van nu verclaert Heer van t'Land,
Dats ommers voor een tijd, com' daer aff naer der hand
VVat vvil, hy sal haer vvel fray vveten te verdooven.
Bloed-dorstich ghemoed.
Het gaef nu juyst vvel pas, vvoud' elck ons nu ghelooven,
Om haer met vlaschen vreed' te bringhen inden strick.
vvraeck-gierich hert.
Mocht dat gheschieden doch, ick vvaer in mijnen schick,
Ick soud my vvreken noch van al dat my misschiet is.
Bloed-dorstich ghemoed.
Met dit cleed, schijn van deught, veel volcx in groot verdriet is
Ghecomen, en noch soud', vvaer ick vvat meer bemind.
vvraeck-gierich hert.
Ghy hebt soo menich Prins sijn cloeck verstand verblind,
Al met u soet ghelaet, en loosefray practijcken.
bloed-dorstich ghemoed.
vvaer ick heel meester, t'soud' claer noch vvel anders bliicken,
Dees roede soud elcken een doen leven int ontsicht.
vvraeck-gierich hert.
Hoe is doch haren name? miin bot verstand verlicht,
Siet sy is doch vol bloeds, vvel straf, en vvreed schijnende.
| |
[Folio B4r]
| |
bloed-dorstich ghemoed.
Tis Inquisici, die t'volck vvel scherp is pijnende,
Als sy s'Paus vvil in als niet volghen metter daed,
Daer dees reed' in svvang is, en helpt gantsch gheenen raed,
Het moet al voort met brand, moord, en aen galg' te hangen,
Mijn bloedigh ghemoed gaet doch al sijn oude ganghen,
Ick spaerder oock niet een, hetzy hoe groot van macht.
vvraeck-gierich hert.
Van menich Coninck ziit ghy daer om oock veracht,
En doen u somtijds heel uyt al haer landen blijven.
Bloed-dorstich ghemoed.
En ghy miin schoone knecht, men soeckt u te verdrijven,
Maer claer niet om u deught, hoe vvord om u ghesucht.
vvraeck-gierich hert.
Ick en verschiet niet haest om eenich cleyn gherucht,
vvant vvaer ick kan oft magh, ick doe my alom eeren.
Bloed-dorstich ghemoed.
Och, mochten vvy doch eens dees Ketters haer less' leeten,
Het vvaer met groot ghevveld, oft met gheveynsden peys.
vvraeck-gierich hert.
Als ick van sulcx hoor, al seen gloeyend' forneys
Brand miin vvraeck-gierich hert, door veel geleden smerten,
Die groot van ghetal ziin, och met vvat goeder herten
Soud' ick sulcx vvreken oock, ick spaerder vrij niet een,
Iae t'kind in s'moeders buyck, dat naeckten groot ghevveen
Miin handen soud' ick noch met haren bloede vvaschen.
Bloed-dorstich ghemoed.
Tiert bid ick soo luyd' niet sy mochten ons verrasschen,
Dat sy sulcx hoorden, ons soet spreken vvaer al uyt.
vvraeck-gierich hert.
Gaen vvy eens vinden dan Geveynsden vreed' ons bruyt,
Oft vvy met haer noch yet te vveghe conden bringhen.
| |
[Folio B4v]
| |
Bloed-dorstich ghemoed.
Al seen Voghelaer soet kan fluyten en fray singhen,
Soo bringt hy oock het volck met liefliickheyt int net.
vvraeck-gierich hert.
Bloed-dorstich ghemoed dat is al near uvve vvet,
vvant ghy light doch altijd seer looflijck op u luymken.
Bloed-dorstich ghemoed.
En al vvat daer ghebeurt, dat kerst ghy op u duymken,
Tot dat ghy schoon vveer siet, dan ziit ghy stout en fel.
vvraeck-gierich hert.
Ick soud clear noch meer doen vvaert tijd en kond' ick vvel,
Maer laten vvy dat daer, en gaen vvy schaffen vvijsheyt.
Bloed-dorstich ghemoed.
In al dat boos volck nu te straffen hier den prijs leyt,
En d'uytstel is seer quaet, gaen vvy op ons bejagh.
vvraeck-gierich hert.
Ick sal al doen dat ick kan, soo ick eertijds plagh,
T'moet gevvaeght zijn vvie 't noch naemaels mocht becrijten,
Die t'best in als doet en is claer niet te vervvijten.
|
|