't Kleyn Hoorns-liet-boeck, inhoudende eenige psalmen Davids, lof-sanghen, en geestelijcke liedekens
(1644)–Jan Jansz. Deutel–
Auteursrechtvrij
[pagina 20]
| |
Wijse. Wel hem die in Godts vreese staet.GHenade vrede seer verblijdt
Wensch ick Godts volck nu ter tijdt,
Als nu tot deser stede
Veel cracht des Gheestes mede,
2 Met alle die ghecomen sijn
Tot die ghemeenschap der Heylighen fijn,
Ghedoopt tot een lichame,
Verandert seer bequame,
3 Van 't oude leven uyt ghetreen
Te wandelen met Christo heen,
Als nieuwe creaturen
Soo langh ons daghen dueren.
4 Wilt neerstigh letten op het woordt
Van desen propheet met accoort,
Als op een licht ghepresen
In duysternis gheresen.
5 Ist dat wy nu ontsteecken sijn
Door 't ware licht van Christo fijn,
Dat moet nu aen ons blijcken,
Of eenighsins ghelijcken.
6 De Arcke Godts, hier wel op let,
Sy was van goude onbesmet
Over vueren hout gheslaghen,
Of wy dit beeldt al draghen.
7 Een Christelijcke wandel goet
| |
[pagina 21]
| |
Men reyn aen ons bepeuren moet
Om soo in liefd' en vrede
Te houden eenighede.
8 O ghy ghedoopte na Christus raedt
Ist dat het soo met ons niet staet
Recht na den gheest, wilt weten,
Christum wy niet en eten.
9 Laet ons eens recht bedencken wis
Hoe Christus lichaem ghebroocken is
Met veel Martelisacy
Om ons te brenghen gracy.
10 Dus most hy lijden in veel smert,
Eer dat hy ons een spijse werdt
Van hem alsoo gheleecken,
Doen hy het broodt gingh breecken
11 Hy nam het broodt en sprack bequaem
Neemt ende eet, dits mijn lichaem,
Dat voor u werdt ghegheven,
Danckbaer wilt hem aenkleven.
12 Doen danckte hy sijn lieven Vaer,
Ia nam den Kelck en gafse haer,
En sprack: wilt daer uyt drincken,
Voor velen gae ick schincken.
13 Mijn bloet als een nieu Testament
Voor u sonden, sijt dit bekent.
Hierom wilt niet vergheten
Mijn lijden in dit eten.
14 Het teycken voor ooghen baet ons niet
Sonder het ware wesen siet.
| |
[pagina 22]
| |
Vrienden wilt recht aenmercken,
't Sijn gheestelijcke wercken.
15 O Heer soo roepen wy u aen,
Met uwen Gheest wilt ons bystaen.
V weghen wilt ons leeren,
En ons gheloof vermeeren.
16 Sterckt oock u dienaer, lieve Heer,
Om uyt te breyden u rechte leer,
Tot lof en eer bequame
Alleen van uwen name.
17 En onse herten in ootmoet
Met Lydia doch open doet,
En maeckt oock onse ooren
Bequaem om wel te hooren.
18 Op dat ons leven werdt gheleydt
Voor u in rechte ghehoorsaemheyt,
Soo moghen wy verlanghen
Van u te sijn ontfanghen.
19 Daer ghy ons hebt belooft ydoon
Te dienen aen u tafel schoon
Met alle Hemelsche scharen,
Daer wy soo gheeren waren.
20 Dan sullen wy met soet aenschijn
Van u ontfangen den nieuwen wijn,
Niet meer stuckwijs als desen,
Maer in een eeuwigh wesen,
21 En singen dan in uwen troon
Blijde lofsanghen alsoo schoon,
Niet wederom te scheyden
| |
[pagina 23]
| |
Maer eeuwighlijck vermeyden.
22 O Prince Vader ende Heer
Wilt ons verlaten nimmermeer,
Weest by ons na den Gheeste
In desen Lover-feeste.
|
|