't Kleyn Hoorns-liet-boeck, inhoudende eenige psalmen Davids, lof-sanghen, en geestelijcke liedekens

[Wilt ghy wesen een Oorloghs-man]

Nae de wijse: Een Ridder ende een Maeghdeken jongh.

WIlt ghy wesen een Oorloghs-man,
Een Camper een Ridder des Heeren,
Laet u teeckenen doe 't wapen an,
Strijden end' vechten moet ghy leeren.
2 Want wy en hebben hier ghenen strijdt
Teghen ons vleesch en bloedt alleene,
Teghens de hoogheydt des wereldts wijt,
Moeten wy vechten in 't ghemeene.
3 Teghen Keyser, Coningh, Vorsten groot,
Al die de duysterheyt regieren,
Moeten wy kampen tot in den doodt,
Oprechten vroom Christus banieren.
4 De schalckheyt, veel argher dan fenijn,
Der gheesten die in de locht wercken,
Moeten wy oock bevechtende zijn,
Haer loosheydt end' bedrogh aenmercken.
5 Sy konnen teeckens end' wonder doen,
En door een schijn der waerheyt lieghen,
Die haer niet vast aen Christum hoen,
Die sullen sy alle bedrieghen.
6 Dus laet ons hopen met goet verdragh,
Verlatende ons quaey manieren,
Op dat ons Godt in den quaden dagh,

[p. 392]

 

Door sijnen gheest mach wel bestieren.

 

7 In een lichaem der sonden subjeckt

 

Woont niet Godts Gheest vry van gheschille,

 

Noch in gheen ziele hy in en treckt

 

Onghehoorsaem en quaedt van wille.

 

8 Maer die Christum soecken vroegh en spa,

 

Om dienen sonder te cesseren,

 

Sal hy ontfanghen en vryen van scha,

 

Indien sy hem niet en temteren.

 

9 Aendoen sal hy haer sijn wapen sterck,

 

Daer mede hy 't al heeft verwonnen,

 

Ende moet gheven, want 'tis sijn werck,

 

Victorie sal hy haer jonnen.

 

Pause.

 

10 Dus staet, weest vroom in al u ghevecht,

 

Omgort u lenden met der waerheyt,

 

Doet aen dat pansier goedt end' oprecht,

 

De gherechtigheyt sonder swaerheyt.

 

11 Weest gheschoeyt aen uwe voeten wel,

 

Met d' Euangelium des vreden,

 

Om te loopen als een bode snel

 

Bootschappen Godts ghenadigheden.

 

12 Neemt aen 'tgeloove tot een schilt

 

Teghen den Duyvel onmanierigh,

 

Waer me gheblust worden en ghestilt

 

Alle sijn scherpe pijlen vyerigh.

 

13 Den Helm der saligheyt wilt noch voort

 

Cloeckelijck op u hooft oock stellen,

 

Grijpt dat sweerdt des Gheest, d'welck is Godts woort,

[p. 393]

 

Om u vyanden me te vellen.

 

14 Draeght Christus teecken dat roode kruys,

 

Treckt willigh uyt met hem te velde,

 

Lijdt smaet, druck, noot, anghst, doot met confuys,

 

Neemt soo sijn rijck in met ghewelde.

 

15 Wilt loopen kloeck met verduldigheyt,

 

Lijdtsaem sonder eenigh verlanghen,

 

In den strijdt die u Godt vooren leyt,

 

Danckt looft, prijst hem met blijde sanghen.

 

16 Wilt roepen, smeecken, bidt in den gheest,

 

End' houdt goey waecke t'allen stonden,

 

Vlucht niet om druck, lijden of tempeest,

 

Een oprecht Ridder werdt ghy bevonden.

 

17 Want die uyt dit strijden wijcken al,

 

Die en sullen Godt niet behaghen,

 

Maer die volstandelijck vechten sal,

 

Tot in den doodt sonder vertsaghen,

 

18 Afwasschen salmen sijn tranen swaer,

 

Sijn lijden dat werdt al ghenesen,

 

Blinckende kleederen wit ende klaer

 

Sal hy aendoen, end' blijde wesen.

 

19 Een kroone met grooter melodij

 

Sal Christus op sijn hooft oock gheven,

 

Dat werdt sijn loon en sijn soudij,

 

Hier boven in dat eeuwigh leven.